每次講親醫療問題，一定會有讀者來函追問，希望介紹，例如深圳電療與懂得中醫之術嘅醫生C。本想回答讀者，但諗起師傅教落，醫師與病人有時要夾緣，未必次次靈，好心做「媒人」或會招嚟發夢都諗唔到嘅麻煩，所以決定都係唔講嘞，請讀者原諒。至於一位讀者問番以前去邊間曼谷醫院驗身，只係驗身啫，每年全世界有近十萬人去呢間醫院驗身，講白無妨，大家可上網查曼谷Bumrungrad醫院，就可在醫院網頁知道詳情。呢間醫院整日人來人往，川流不息，讀者在農曆假期去，未必預約得到。一位讀者來函話佢睇完五青汁一文，立即買咗一部榨汁機，自製五青汁，覺得好飲，新鮮好味，行出街頭，已有果汁小販賣五青汁，十元一杯。事實上，五青汁早已有之，好多地方有得賣。
上星期六晚睇電視新聞，知道台灣立法院選舉，國民黨大勝，贏到離行離列，事先真係諗唔到。醒起大記者去咗台灣睇選舉，立即打電話搵佢：「喺邊度呀？」大記者話：「坐喺國民黨總部等馬英九出嚟見記者。」問：「仲有冇變數呀？」大記者答：「國民黨贏得太多，𠵱家有人驚民進黨出術，唔知會唔會突然發生開槍事件、電腦當機，流失選票資料或者陳水扁宣佈戒嚴呢？」唔會啩？咁多陰謀論傳出，皆因大家對陳水扁及民進黨全無信心，認為佢哋乜都做得出。政治人物嘅信譽衰到咁，如果民進黨人真係讀過書，點會唔滿面羞慚呀！
好彩，乜事都冇發生，陳水扁出嚟見記者，雖然面黑黑，但係識講祝賀國民黨之詞，且引咎辭去黨主席一職，算佢有番啲禮貌，恥辱感，國之四維之中佢還保存一維。陳水扁說話係流利嘅，反觀馬英九見記者，說話就太小心嘞，幾乎背書都唔識，講得好辛苦。國民黨成班大員個個繃起塊面，唔知嘅，仲以為國民黨輸得好慘㖭。中國人之DNA就係唔敢公開表達感情，驚俾人批評得意忘形，表現囂張，一定唔敢笑，此之謂謙卑或戒慎恐懼。吳伯雄引述馬英九話：「高興一晚就好了」，忍得真辛苦。左太話：「佢哋會唔會閂埋門就大笑大跳，好似希拉莉咁呢？」閂埋門都唔敢笑嘅話，恐怖啲啩！