「滑滑呀嘟嘟似豬膏咁滑，牛油蛋撻冇咁滑。」如果曼聯大紅人基斯坦奴朗拿度（C朗）識中文，肯定好鍾意紅極一時嘅經典名曲《牛油蛋撻》，事關佢自爆嗜「撻」如命，總之係撻都愛，唔知佢食過蛋撻冇呢？
當歐洲球星高呼頂級球會賽程頻密之際，踢到識飛嘅C朗不但冇絲毫疲態，而且越踢越有，上仗聯賽鬥紐卡素大演帽子戲法，還要求老費畀佢唞少啲出多啲場，成個鐵人咁款，不免教外界研究其養生之道？
嗱，英國《太陽報》就揭開謎底──食撻也。笑容甜絲絲嘅C朗坦言擇「撻」而噬：「我承認對撻具特別癖好，每次操練後都食撻『叉電』，尤其係忌廉撻，亦會盡量試唔同種類嘅撻。」
英國口語「撻」解妓女
腳法能人所不能嘅C朗，精力充沛，講起撻就伸伸脷，加上鍾意食肉批，無怪乎《太陽報》嘅編輯聯想到食色性也嘅關係。因為「撻」（tart）呢個英文，喺英國口語中可解作「妓女」嘅意思；舊年C朗邀請5名性工作者返屋企，大玩性派對，卒之咪搞到自己杰撻撻咯！
傳說中《牛油蛋撻》嘅初版歌詞係牛油「忌廉」，但後來唱唱吓先唱到「蛋撻」。忌廉？正係C朗至愛，呢首歌你話係咪啱「C撻」聽先；再聽埋呢句「迷人面珠我好想錫一啖，味香滑，如食新鮮蛋撻。」歌詞確係到肉：C朗歡喜新鮮嘅撻，女球迷就想一親其迷人面珠。
除食撻儀式，向來貪靚嘅C朗亦有整頭儀式，每場賽前總會去髮廊洗洗頭、恤恤髮，一搞就搞幾粒鐘，係咪「姿整」就見仁見智喇！最近紅魔簽入被譽為「新傑斯」嘅16歲愛爾蘭翼鋒羅拔柏拉廸，未知大師兄C朗會否介紹靚撻畀後者呢？