名人效應幾時都唔落伍，之前銀行開拓個人銀行服務，渣打（2888）搵咗DoDo姐鄭裕玲、滙豐（005）就有張曼玉做代言人。噚日法國巴黎銀行推出股份掛鈎投資（ELI）合約，針對嘅客仔唔係富戶，而係普羅大眾，於是搵咗無記雙料視帝陳豪，分享吓佢嘅投資心得。
負責呢個產品嘅法巴香港股票及衍生產品零售部主管蘇平恩話，有追睇《溏心風暴》，覺得陳豪演嘅「得得地」角色深入民心。
不過華華八到，「得得地」投資股票都有一手，仲知佢揸住滙豐同阿里巴巴（1688）。
陳豪話啲錢好辛苦搵番嚟，所以投資一定要小心，唔揀高風險，買親嘅股票都以穩陣、高息為主，一心長揸。呢幾日跌市佢一啲都唔擔心，仲話趁滙豐股價跌，正好入市，跌吓又入啲，噚日滙豐勁跌4.8%，收報115蚊，唔知佢有冇入貨呢？
另外佢都有抽新股，好似阿里巴巴，佢抽到兩手，佢話睇好呢間公司唔只值咁少，但就冇講睇幾多銀，總之一於長揸唔放住啦。