喺早前正式揭幕嘅美國底特律車展入面，德國Mercedes-Benz展出咗一款名為VisionGLK嘅新款SUV；造型同頂級GL-Class相似嘅佢，分有Freeside同Townside兩個版本，動力源自一台注入咗BLUETEC技術嘅全新環保柴油Turbo引擎，馬力輸出可達170匹。相信喺今年秋天正式登場時，定會成為SUV車迷嘅新寵。
柴油引擎着重低排放
VisionGLK分有Freeside同Townside兩個版本，前者主要適合行走一啲越野路段，而後者則配備跑車懸掛組合，能有助車子喺唔同路面上行走。車廂陳設方面，闊落空間係主要賣點，不同內裝亦有助分辨出係邊個版本。
但我最欣賞嘅都係佢嘅機械配搭，當你打開頭冚，就會發現內裏原來收埋咗一台全新嘅2.2公升柴油Turbo引擎，佢注入咗廠方獨有嘅BLUETEC環保技術，能有效減低耗油及廢氣排放外，更可輸出達170匹嘅馬力；此外，波箱亦係最新嘅7G-Tronic半自動款式，配合埋4Matic四驅系統，性能表現可謂毋庸置疑。
記者：鄭達基
