香港嘅工商界名人大都一身兼數職，仲會孭埋唔少官方或者半官方機構公職喺身，可以話係回餽社會，亦係身份嘅象徵，而一向公職無數嘅中原地產老闆施永青，噚日竟然同華華講，等孭緊嘅公職委任期滿，就一個都唔再做喎。唔通施老闆有新搞作？
噚日中原舉行一年一度精英會迎新大會，老施親身為新一屆精英會會長蔡佩芳加冕，佢企喺台上面發言時，已經露咗口風，話呢啲活動下年都唔使佢呢個集團主席親自出馬，公司咁多人。咁感慨似乎語帶雙關。
會後華華捉住老施傾，佢順口話諗住唔再做其他公職，仲話：「我要講嘅都講晒啦！」但係啲公職係人哋委任，點都要做到完為止。華華查過，老施家陣孭住嘅公職包括房委會委員、策發會委員等。
唔做公職咪多咗好多時間？唔通老施要抽多啲時間睇住份免費報紙《am730》？抑或想學李超人或者李四叔咁，搞番個基金做吓慈善咁呢？
專心整合中港業務
老施話，份《am730》一年營業額先得1億銀，同中原地產1年60億生意比只係六十分之一，按呢個比例，家陣每日揼一粒鐘落去寫稿都嫌多。至於公益事務嘅嘢，佢話係有做緊啲嘢，但唔講得住，費事老婆鬧佢未做到成績就話畀人知喎。佢仲話，老婆要佢抽多啲時間陪佢，所以其實唔會好得閒。華華多心啲諗，會唔會最反對起居屋嘅老施（見下文就知佢有幾反對），唔滿意近日政府對恢復居屋嘅態度軟化，把心一橫停晒啲公職呢？
不過，老施有意將香港同內地嘅中原整合，聽講希望中港系統可以互通，話唔定佢就係忙緊呢樣嘢。
施永青現任及曾任公職
《現任》
‧香港房屋委員會委員
‧資助房屋小組委員會委員
‧房委會商業樓宇小組委員會委員
‧香港地產代理監管局成員
‧香港策略發展委員會委員
‧香港小交響樂團監察委員會委員
‧苗圃行動名譽理事
《曾任》
‧香港醫管局醫院管治委員會成員
‧香港樂施會投資監察會委員
老施敢言作風
月/年：09/02
施語錄：「居屋根本毋須興建，因為居屋目的係幫市民做業主，而唔係幫市民解決居住問題，市民應該自行儲錢置業。」
月/年：05/05
施語錄：「政府冇責任幫市民做業主，冇需要再起居屋……如果佢係投資，你幫佢做業主，蝕咗本咪賴你？」
月/年：11/06
施語錄：「當年有份通過有關公屋租金條例嘅立法會議員不負責任，罔顧現實，累死公屋居民。」
月/年：06/07
施語錄：「要房委會嚟做乜？你（立法會）做埋佢啦！」
月/年：10/07
施語錄：「如果恢復興建居屋，等於畀有錢人（公屋富戶）可用低價買到樓，咁根本係浪費資源。」