中國國航（753）母公司中航集團話過，否決咗新加坡航空入股東方航空（670）之後，會喺兩星期內提出新方案，計計吓，仲剩番唔夠一個禮拜（22號前）就要出嚟交代。
身為國航盟友嘅國泰航空（293），早排發埋通告，話會「積極考慮」玩埋一份，咁啱噚日國泰CEO湯彥麟喺敏感時刻蒲頭，華華梗係問佢睇過國航份計劃書未。湯生答得非常小心，所有關於單刁嘅嘢都係得一個答案──nocomment，最多搭多句「樂見」份計劃書，但點都唔肯話「支持」，留番啲餘地畀自己都啱數。
既然唔講單刁，講吓善事係人都啱聽。國泰同聯合國兒童基金會合作搞嘅「零錢布施」，唔經唔覺已經有17年歷史，向飛機搭客籌到嘅外幣零錢，前前後後超過8100萬港銀，全部捐晒去幫助世界各地嘅小朋友。單計舊年就籌到1000萬港銀，破咗歷年紀錄。如果國泰將呢份善舉宣揚畀盟友國航，捐款金額真係唔講得笑。