相信唔少女仔都會好似小妹咁，好鬼死鍾意去日本北海道旅行，仲要每次都要去小樽買當地特製嘅玻璃藝術工藝品，真係好鬼靚，次次去到我都一定會買幾件返嚟送禮自用。
展出逾300工藝品
近排同個超級日本粉絲朋友傾開，諗住等埋農曆新年之後去北海道旅行，順便去小樽買多幾件玻璃藝術工藝品，個朋友即刻話我知銅鑼灣崇光搞咗個「小樽的玻璃世界」展覽會，叫我去睇吓當「望梅止渴」先。
個展覽喺銅鑼灣軒尼詩道555號東角中心新翼16樓舉行，昨起一連五天擺放咗由10幾位嚟自小樽嘅玻璃工藝家，展出逾300件用人手精心打造嘅玻璃工藝品。雖然所有工藝品都冇得買，但係睇吓都會覺得好開心。好似小椋利勝嘅「十二生肖」裝飾，每隻生肖嘅造型都好得意，仲有安井顯太嘅「油燈」，仲係免費入場㗎。
逢周一至周四刊出