年近歲晚，小妹想買啲漆油髹吓間屋，噚日同消委會啲老友傾開偈，佢話選擇漆油要小心啲，因為漆料含有揮發性嘅有機化合物（簡稱VOC），包括甲醛、苯、田苯等，會對健康造成急性或慢性不良影響，好似高濃度會引起眼睛、鼻子及喉嚨不適，甚至頭痛、暈眩同影響視力，長期接觸仲會增加致癌嘅機會。
老友話，今年1月1日起環保署實施咗25種建築漆料或塗料中VOC，唔可以超過其訂明限值嘅規定。但係有啲產品喺法例生效前已經入口，如果嗰啲產品嘅VOC含量超標都可以賣，但供應商一定要喺產品包裝貼上標籤，以資識別。但消費者盡量避免選購呢啲超標漆油，即使減價都唔好買。
老友又教路，挑選漆料嘅顏色同功能之餘，應該比較唔同品牌同系列嘅VOC含量，最好選用VOC含量較低嘅產品。一般嚟講，漆料中有機溶劑成份越高，或者需配合有機劑稀釋使用嘅漆料，可以揮發出VOC的機會越大。另外，光澤度較低漆料嘅VOC一般較低，而水性漆料嘅VOC比油性漆料低。
逢周一至周四刊出