前晚花旗股市跌277點，道指報收12501，個勢好曳，如果跌穿12300，睇怕12000關都守唔住，花旗嘅次按危機已經失控，失控就會令人驚慌，投資者可以變得更唔理性。
港股昨日跟住花旗股市跌，而且跌幅更勁，唔見1386點，25000關穿埋，晏晝出現「要錢唔要貨」場面，指數已逼近250日線（23426），應該係昅實買貨博反彈嘅時候，不過，呢啲係刀鋒舔血嘅玩意，千祈唔好咁大注。個市要反彈，一定係抽地產股，搵定啲輪睇位入貨。
新世界C輪1871：新世界（017）昨收25.55元，落到條100日線果然見大行護盤，「十字星」收市，係反彈嘅時候嘞，股價會先試28元，破唔破到位到時要睇成個市嘅氣氛，可以買啲C輪1871，昨收30.5仙，有效槓桿率3.9倍，正股升上28元，1871睇43仙，有近41%升幅，正股跌穿24.50元止蝕。