每年嘅大事回顧，越嚟越多花款，另類啲嘅例如流行語，更加反映到過去一年大眾嘅潮流。內地北京語言大學同《網易》搞咗個中國十大流行語嘅投票，結果噚日公佈，據《中國網》報道，網友選出嘅十大流行語中，同經濟相關嘅有「人民幣升值」同「CPI上漲」，「CPI上漲」一詞仲有句順口溜，喺內地唱到街知巷聞──「你可以跑不過劉翔，但你必須跑過CPI」。你冇聽過？太out喇。
CPI即係消費物價指數，呢個指數喺07年有幾漲，香港人都感受得到，內地豬由上年5月開始就肉價急升，創下11年嚟新高，連帶香港人都要食貴豬肉，華華主觀覺得，呢幾個月嚟，出街食親豬柳或午餐肉，都發現塊肉好似紙咁薄，而其他肉類、雞蛋都水漲船高，CPI再係咁漲法，睇怕劉翔就嚟要跑輸畀隻豬。
基民回報豐厚
至於人民幣升值，可以話係萬眾期待，華華唔少朋友甚至開定人仔戶口等升值，《中國網》話，07年初，市場一般預期人仔兌美金滙率升5%左右啫，點知到上年12月20號止，人仔已經升咗約6%。
呢個「2007年媒體流行語」共有110個，除咗例牌咁選出十大，另外亦按六大類四大專題，選出唔同範疇嘅流行語，今年仲新加咗過金融專題類別，當中有唔少新名詞㖭。
07年除咗「CPI上漲」，內地嘅「基民」同「新股民」人數亦都上漲，唔係嘅話，A、B股邊炒得咁㷫烚烚。「新股民」唔使解釋大家都明，而「基民」講嘅唔係性取向，而係有買基金嘅人，上年牛市令基金表現突出，「基民」回報豐厚，據《中國網》報道，至11月底止，內地121隻側重股票嘅開放式基金，平均淨增長率有成78%。
電郵：mailto:[email protected]
07年內地經濟
相關流行語
《綜合類》
CPI上漲、基民
《經濟類》
土地增值稅、人民幣升值、燃油附加費、成品油價格調整
《金融專題》
加息、QDII基金、股指期貨、新股民、港股直通車
《構建和諧社會專題》
勞動合同法
資料來源：中國網