韓國人氣女子組合WonderGirls憑快歌《TellMe》唱到街知巷聞，佢哋嘅舞姿連警察、軍人都要模仿跟住跳，成為網上熱播短片。五位成員中，年紀最細嘅係只得15歲嘅昭熙，仲讀緊初中嘅佢近日被網友公開佢嘅素顏返學照，fans睇咗後都俾佢個攰樣兼包包面嚇親。
網友嗌恐怖
網友BigBangOnTop喺Daum討論區睇到相片後留言話：「佢嘅素顏樣真係好恐怖，哈哈。」另一個網友會員情報管理都好唔留情話，再次證明只要靠化妝、髮型同燈光，所有人都會變靚。至於eASSHI就話，唔明點解昭熙咁黑口黑面，覺得好失望。
當然有唔少fans力撐昭熙妝前妝後都好可愛啦，不過TEUROPAE就奉勸佢唔好冇表情，要笑多啲。畢竟佢依然係中學生，既要工作又要讀書，所以上堂勁攰、面部勁脹都情有可原。阿Deep認為𠵱家做青春偶像真係辛苦，要兼顧學業同事業外，又要接受網友批評。昭熙妹妹真係要努力加油啊！
版主：網盜王尊尼Deep
本欄逢周一至五刊出
網址： http://tvzonebbs1.media.daum.net/griffin/do/photophoto/read?bbsId=A000004&articleId=301665