大前日同內地武打小生張晉拉埋天窗嘅無綫花旦Ada蔡少芬，佢哋兩公婆噚日離開咗香港，不過去邊就眾說紛紜，有消息話佢哋此行係去泰國度蜜月先，跟住先返張晉重慶老家同親戚朋友食餐飯；又有消息話張晉要先去北京傾拍戲嘅事，蔡少芬做跟得老婆陪佢去北京先，農曆新年左右先可以返重慶。
另一消息話佢哋已經返咗重慶，呢對新婚夫婦嘅行蹤成謎，不過去邊都冇所謂啦，見佢哋咁幸福，馮仁昭都替佢哋高興。
有份出席Ada婚禮嘅陳美琪，日前喺自己個blog度公開Ada婚禮嘅情形，仲張貼多張照片。陳美琪提到對新人先後感謝雙親嘅養育之恩，堂堂男子漢嘅張晉講到聲都震埋，Ada仲哭成淚人，場面感人。之後朱茵就帶領姊妹團獻唱，男友黃貫中喺隔籬伴奏，身後嘅韓瑪利都忍唔住喊㖭。
親密照曝光
仲有內地演員萬弘傑日前喺新浪嘅網誌貼出Ada同張晉嘅「珍藏」照，萬弘傑話呢一對係佢見過咁多戀人之中最親密嘅一對，因為佢哋係「打電話頻率最高的一對」喎！另外，有傳聞話張晉媽媽向傳媒爆話今次婚事，係女方做主動嘅，但係呢個消息未得到證實。
陳美琪blog圖片
http://blog.sina.com.cn/s/blog_499eb885010086il.html
萬弘傑blog圖片
http://blog.sina.com.cn/s/blog_4ae2af230100896j.html
