究竟飛機、火箭、炸彈，同打地鼠有乜關連！答唔出？只怪你同Game界完全脫節，要再教育！知道係街機《鬥地主》？相信同筆者一樣，好快會變成「無產階級」鬥士！訪問香港Top3鬥地主之王，勁到俾台灣IGS請去一戰港澳台鬥地主寶座；據知佢哋平均每月花上$2,000-$4,000操機，想好似佢哋打得咁勁，今日要學嘢喇！
記者：朱崇德
攝影：譚盈傑、朱崇德
鳴謝：觀塘金沙遊戲機中心
中國人嘅橋牌！
鬥地主（BattlingtheLandlord）係中國人發明嘅一種橋牌（相信老外唔明打乜，所以只係在華人間Hit玩！），玩法有啲似3人鋤大D再加2隻Joker。點解咁好玩？一人做地主要盡快結牌，其餘兩個佃農就奉旨打龍通、夾計鬥死佢就雙贏，唔再係鋤D咁牌靚係一切，出牌打法多變好多！
機舖靠佢起死回生
𠵱家鬥地主差唔多成為香港人一種國技！酒吧隊酒、落場賭兩手，簡直無日無之。不過最勁都係街機上嘅連線對戰，據香港代理表示：「現時港澳台有1,800部街機做連線對戰，當中有1,300部在香港（台灣400、澳門100）！」粗略估計香港有100餘間機舖，即係差唔多每間舖都有過10部！更勁係每晚放工時間都仲係人等機，據機舖老闆表示：「好多細舖放十部八部就撐得起成個場嘅收入，全盛時期真係好似當年街霸、拳皇咁喪入錢。不過近年香港人打得叻咗，$3一局打足12Round，收入相對少咗。但香港機舖沉寂一時，可以話完全靠佢起死回生！」
香港Top3準鬥神教打牌
台灣曾舉辦首次「台港澳鬥神大賽」，香港代表同時取下冠亞軍。第二屆比賽在即，3位香港代表教吓你點打！
遊戲暱稱：MICHAEL2──梁金勇
最重要係多話事牌喺手，唔一定要多Dee又鬼先叫話事牌，例如啤夠大、蛇連Ace尾、雙順夠大又夠長、有炸彈喺手都可以話到事。最緊要計算自己有由頭至尾話事權先做地主！
遊戲暱稱：MINGFUK──蔡明福/東地盟
打鬥地主最基本係數窿，睇自己3仔至Dee、鬼欠邊門牌，嗰啲就係隱藏炸彈同火箭，而再喺出牌途中引導對手出呢啲牌；引都唔出即係有飛機炸彈，一定要小心。拆局是指做佃農、牌弱時，唔依章法盡出大牌，望打亂地主出牌次序，造就機會俾另一位佃農贏牌。數全副牌窿位，只有J、Q兩門，先行啤、再單支引佢哋出嚟，好彩嘅單支已引到黑鬼、再用紅鬼冚；跟住出蛇、3，以4仔炸彈同啤Dee做護航。
遊戲暱稱：U169──蔡靈凱/東地盟
地主21張牌、兩個佃農17張，做得地主通常牌靚，佃農以弱勝強最重要係互相配合贏牌！留心如果另一佃農唔多識出牌或同你唔配合，輸牌後唔好再跟機。好多台灣Gamer夾做佃農時，會頂自己友牌，皆因佢哋唔計成敗都一定要結牌，呢啲佃農少夾為妙。
名人鬥神 月打$4,000
街機鬥地主有1-99級制，玩過都知30級係一個關口，打過上千鋪、累計經驗上8,000分先達到！不過今日請嚟嘅香港一班「名人級」鬥神，簡單講係99級之上、平均經驗分達5-8萬以上先做到！佢哋仲自組為「東地盟」（東九龍地方聯盟）：「我哋個會有三十幾人，全部達名人級。粗略估計香港有上千個『名人』，台灣就有三數百個，可見香港人有幾鍾意打鬥地主！」
Joey（月打$2,000-$3,000）
一般電腦遊戲可以打Formula，鬥地主好玩在連線，隨時同台灣人、澳門人對戰。
蘇生（月打$2,000-$4,000）
由啤牌學鬥地主，兩年多前玩街機版，打經驗值、唔使賭錢，隨時齊腳打，健康啲！
大頭妹（月打約$2,000）
平時好少上機舖，起初連鬥地主係乜都未知！後來偶然跟朋友打街機鬥地主，馬上愛上。
阿Ken、阿凱（月打約$2,000）
唔會玩自閉！去唔同機舖隨時撞到舊對手，一講自己個IP就熟絡，有時仲識埋做朋友。
