蘇施黃放假，接棒暫代主持一季節目，同樣與食有關，節目名字當然也要食一食字，《味力昭人》是也。「你對呢個關於食嘅節目有咩諗法冇？」編導組的領導問我，「未有咩諗法，總之唔好係我一條友帶住幾個女仔去食啲嘩好有口感嘅嘢就得嘞。」我邊搔頭邊答。經過幾星期的思考及討論，度了幾個環節，其中一項是我跟名人朋友邊吃邊談，強調是名人朋友，只希望邀來的嘉賓本來就是朋友，就像以往大家聚餐一樣，只不過多了幾部攝影機。
消息傳出後，收到一通電話，心頭一陣暖，「你個節目係咪開始拍嘞？我同阿V商量過，可以一齊上你節目喎，唔係一定，你袋住先，需要就話我聽。」倪老震在電話中對我說。早已準備打他倆主意，只是他倆好像從未同時在任何節目中接受過訪問，所以不知如何開口，竟然在我費煞思量時，主動報名掛號，教我如何不愛這兩口子？「我哋係咪好可愛呢？」阿V在拍攝前笑着站在我面前，確是可愛到極點，不懂如何言語，只懂把她當好兄弟般緊緊攬一攬。
吃吃談談了好一會兒，很多方面也談到了，得到一些很很有趣的答案，例如阿V的養顏食療秘方竟然是倪老震，問倪老震有否做過一些很SweetSweet的事，答案竟然係「有！但係我唔想嘅……」，問阿V倪老震最大的優點是甚麼，阿V說：「喺我需要佢嘅時候，佢就會無端端出現。」聽見這答案，鼻頭一酸，戥人開心的那一種喜悅感動酸。對男女之間相處之道有興趣者，請留意星期六晚節目播出吧。