胡杏兒同黃宗澤呢對緋聞情侶近日喺《野蠻奶奶大戰戈師奶》帶挈下，頻頻情侶檔接工作，噚日佢哋又以戈生戈太嘅身份到尖沙嘴西武出席願望成真基金舉行嘅籌款活動。
自慚形穢
為配合《野》劇中時裝界潮人嘅形象，杏兒同宗澤幫兩名僅穿內衣嘅男女模特兒揀服飾，佢哋顯得好尷尬，宗澤仲唔敢行近女模特兒，反而杏兒見到男模特兒着住虎紋底褲時，眼甘甘咁笑住話：「佢條老虎好勁，不如唔好着牛仔褲啦。」
事後杏兒同宗澤讚模特兒身材好弗，杏兒仲自覺慚愧。問佢哋敢唔敢着內衣行騷？宗澤好抵死咁話：「如果我有八嚿腹肌都會，但我𠵱家得一嚿。」杏兒都寸佢話：「我都以為你得一嚿咋。」杏兒又話唔會着太性感嘅衫行騷，加上公司有好多身材好好嘅女同事，所以冇乜人搵佢做泳衣騷。
杏兒同宗澤話試過約埋汪明荃一齊行街，早排佢哋三個行金鐘仲俾周刊拍到，佢哋強調事前唔係同周刊夾定，唔好誤會喎。
此外，阿姐噚日以八和會館主席身份喺佐敦出席香港粵劇發展建議書嘅發佈會，並展示呈交政府嘅建議書，指出香港粵劇面對場地及培訓不足兩大問題。新光戲院出年拆卸，佢哋會向政府建議重新規劃北角用地興建粵劇表演場地。佢又話：「接班人應該由細培養，雖然演藝學院有粵劇讀，但中五畢業先讀得，到時學員骨頭硬，點學呀？應該要有間學校培育。」
