「珍姐邦」非常打得，五、六十年代橫行香江，而且領導世界潮流，打低荷李活，佢嘅英文名叫JaneBond，是近十餘年才被美國學者追封，史稱「奉旨打男人的女人」。其實佢嘅真名係：女飛俠黃鶯、黑玫瑰、紅玫瑰、白蝴蝶、女黑俠木蘭花、女殺手……電影資料館搬出「珍姐邦電影展」，「珍姐邦」捲土重來，臭男人！你有難喇！
記者：馮敏兒
攝影：黃子偉
影史上娥眉派祖師──港產珍姐邦
一部源於四十年代的上海流行小說《女飛俠黃鶯》（作者小平），主角智勇雙全、行俠仗義，是為「珍姐邦」創派祖宗，五十年代末拍成電影，即成當世無雙的女中豪傑，電影史上第一次。雖說城中玉女個個都係「珍姐邦」粉絲，但講到祖師身世，個個主觀投入，言情激動，搞到記者啼笑皆非，最後終於從大男人吳昊教授的「冷靜分析」中得救。不過我們還是先聽聽「珍姐」後人的剖白吧！
粉絲剖白
「這些『壞女人』壞就壞在太機智、太打得，對男人太有威脅！」真人不露相的著名女影評藍天雲話：「我哋嘅珍姐邦香港獨有，中國、台灣一樣冇，西片更加冇。荷李活勁保守，冇可能俾女人橫行，就算有都唔係普通人，或者有超能力，但我哋嘅珍姐係女工，係普通人，武功可以苦練，自己開公司，獨立自主，唔似《查理的天使》背後老闆還是男人，妳幾威都好，最後都要做番一個師奶、玉女，註腳甚至是心理唔正常。」藍天雲形容珍姐邦的出現是舊上海都市化後對俠客和女人的想像，也受西方流行小說影響。她跟一眾「蘋果女」一樣齊封「黑玫瑰」為偶像，佢冇家庭負擔、有錢又個性獨立，南紅、陳寶珠兩姊妹的雙重性格，為女性自身的寫照。
黑玫瑰宣言
口咬紅玫瑰的「蘋果女」Elaine，情迷「黑玫瑰」皆因：「佢剛中帶柔，好Man，又好有女人味，唔係男人婆！」問佢係咪好想做「黑玫瑰」？「以前啲女仔或者會好羨慕女黑俠，但鍾意還鍾意……其實現代女性大家都好想俾男人保護㗎！」難怪強如前第一夫人希拉莉都要扮番婦孺！藍天雲云：「鋤強扶弱不是珍姐邦重點，重點係佢叻到可以幫啲『儍更更』嘅記者，『懵盛盛』嘅探長，去解決問題！」吓，你講我呀？妳妳妳就係「黑玫瑰」！
黃鶯Fight低查大俠
「言歸正傳」，吳昊教授說JamesBond的相反就是JaneBond，指女主角非常打得又戲份多，流行於美國低成本少眾B級片製作，但在主流荷李活電影裏則絕無僅有，但珍姐邦不但最早在香港出現，「打女電影」更是主流。昊Sir話：「整個五十年代的通俗小說都是女俠、女飛賊、紅玫瑰、白蝴蝶，流行程度比後來的金庸武俠小說更勁，《女飛俠黃鶯》就拍過不下十套粵語片。倪匡也寫過黃鶯，但佢唔肯認，他後來寫的《女黑俠木蘭花》其實是黃鶯突然消失，退隱江湖，才變出個木蘭花。」
女人執法夢工場
珍姐邦替天行道，其實是群眾的意識，昊Sir認為最有趣是為甚麼大家都希望女人出嚟執法？佢估計：「過去殖民地社會，官商、黑白道勾結，大家都腐敗，所以一般升斗市民好慘，都叫自己做『沉默的大多數』，冇機會提出指控，而『沉默的大多數』中身份最低微嘅唔係男人，係女人，所以對主要觀眾為婦女的粵語片，女俠片有打鬥、機關、特技，題材煞食！起碼師奶鍾意、工廠女工鍾意、男人都可能鍾意！」
三代珍姐邦 原著、寶珠、邵氏
「珍姐邦」分三代，「女俠盜黃鶯」時代Sell小說原著賣懸疑；第二代Sell偶像，陳寶珠、蕭芳芳，但製作一般；第三代則是邵氏年代，靚人靚景、大製作大場面、特技、音樂都非常認真，更自詡為東南亞的占士邦，現在睇番一樣咁勁，如《金菩薩》、《鐵觀音》。「因為李小龍嘅電影掂，珍姐邦影響力更深入非洲，變身女黑人珍姐CleopatraJones，她後來還在邵氏片中大顯身手。」昊Sir話打女戲從未沒落，總有一定市場，但亦不能完全控制電影主流，雖產量不多，但從未間斷。
黑玫瑰、木蘭花、白蝴蝶……醒醒喇！
珍姐邦誕生於婦女尚未獨立的年代，她總有兩重身份，日間是弱者，有很多解決唔到嘅俗世煩惱，夜晚出動就變成另一個人，這個「變身隱喻」昊Sir認為同我哋食唔飽，發夢食大餐嘅滿足感一樣，如有雷同，實屬必然。但這場在1967年達到高峯，集中國「玉女」傳統、戰後青春文化、女性意識抬頭、西方生活方式浮現的「珍姐熱」，則別無分店「只見香港有、世界各地無」！雖然維護司法制度嘅黃仁龍司長，一定會叫妳唔好學「黑玫瑰」，但「沉默嘅大多數」其實好需要妳。珍姐妳係咪又係時候出手喇！
奉旨打男人的女人──珍姐邦電影展
踏入2008，電影資料館即高舉奉旨打男人，齋睇題已叫爽！影展精選9齣「珍姐邦」類型電影，相信天下女性都願接新007丹尼爾基克的棒，熱捧今趟「008JaneBond」。同期資料館一樓展場還有由從電影輯錄而成的錄像展出「珍姐邦小型視像展」。26日《黑玫瑰》放映後有免費座談會，講者包括浸會大學電影電視系教授吳昊及影評人朗天。
日期：1月26日至3月2日
地點：西灣河香港電影資料館電影院
票價：$30
查詢：27392139
網址： http://www.lcsd.gov.hk/fp
阿美利堅邦 JesseJames之死
又係J字頭又叫占士！一個美國家傳戶曉的真人版羅賓漢，一個1870年代劫火車的汪洋大盜JesseJames，一個被煽情新聞和廉價小說塑造成大眾偶像的傳奇故事，被拍成電影《叛逆暗殺》，即令飾謝西．占士的畢彼特贏得今屆威尼斯影展的影帝，口碑極好，但佢差在太有型，反不及刺殺他的CaseyAffleck（飾羅拔．福特）出色，他由崇拜的追隨者到行刺者，再到他把刺殺的英雄事迹搬上舞台，不斷重演，着着令人對他「假面」背後的「真目」無法把持，才是電影最過癮之處。一位無視法律充滿魅力的反叛者，惡名昭彰的罪犯，同時又是美國自由精神的象徵，導演扭盡六壬用了兩個多小時，建構刺殺行動的前因後果，原來是因為從來沒有人如實說過刺殺行動的細節。不過當港版美女羅賓漢，遇上美式羅賓漢，我更期望是一場決鬥！
