中華廠商會副會長羅富昌有鳳卜歸昌之喜，一月九日在君悅酒店大排筵席。左丁山因工作時間與別不同，晚上九時許就要回家睡覺，不能久留，所以收到請帖之後，考慮再三，都係決定唔去，以免人哋開始食乳豬之際，左丁山就要起身拜拜，更加冇禮貌，於是託中貿林送上禮券，賀昌哥做岳父。聽昌哥啲老友講，昌哥快婿乃內地才俊，故此先在一月九日擺酒，第二日飛往北京請飲，到咗一月十二日，又回到香港擺酒，都幾舟車勞頓也。不過嫁女喎，咁大件喜事，昌哥多多都冇計。
昌哥在中大崇基學院讀地理，攞埋中大MBA，𠵱家有個外號，就係中國易拉罐王，係白手興家典型，香港工業家範例。佢仲有一樣厲害，就係精於子平之學與紫微斗數，左丁山成世人俾人第一次開個「命盤」，就係昌哥傑作，相信佢有今日之成就，一早算定咗咯。
中貿林與昌哥份屬死黨，參加世姪女婚禮之時，或者會諗吓自己幾時做外父，此乃所有爸爸媽媽之「焦慮症候」。因為怕自己個女太叻，忙於事業，嫌啲香港男仔唔夠醒也。中貿林千金係會計師，終日飛來飛去核數，飛到夢裏不知身是客，中貿林點會唔心掛掛吖。
唔想掛住，不如自己找尋活動，譬如打高球、跑馬、睇英超聯，包保可以「謀殺」不少時間。睇英超聯動態，亦可領略管理藝術，譬如曼聯對費格遜爵士好有耐性，費Sir做領隊二十一年，攞冠軍無數次，包括十一次英超冠軍。紐卡素就在二十一年內，換咗十一個領隊，一事無成，最接近嗰兩次就係奇雲基瑾做領隊年代，攞咗兩次亞軍。紐卡素大班主MikeAshley賣咗四十三間連鎖零售店，套現十億英鎊，唔好以為係好多錢，佢炒領隊艾拿廸斯，已經要賠四百萬鎊啦。大老闆應唔應該成日炒人呢？或者畀領隊起碼三年時間呢？呢類問題認真難答，足球會如此，大公司何嘗不然，第日與昌哥飲茶，問吓佢嘅專家意見至得。