唐雙寧自去年中接掌光大集團董事長呢支火棒，着手重組光大，成功引入中央匯金注資光大銀行，光大銀行A股上市亦都通過埋，唐雙寧作為主帥指揮有道，可謂大顯身手，但呢位金融界武將接受《上海證券報》訪問時話，自己只係略通金融，書法先係佢強項。
噚日《上海證券報》刊登唐雙寧嘅專訪，講到佢為咗完成光大重組呢個艱辛任務，精神緊張到晚晚眼光光，要食安眠藥先瞓到。而為咗令中央匯金入股方案順利通過，佢宴請股東曉以大義，希望獲得支持，搞到本嚟唔好杯中物嘅佢，終於要破戒，同一班股東亁杯。
咁大壓力，唐雙寧嘅解決方法就係寫書法，佢呢個興趣好多人都知，港交所（388）交易大堂有幅字畫寫住「紫氣東來」，就係出自佢手筆，唐雙寧尤其精於「狂草」，華華睇過，絕對係龍飛鳳舞，真係幾好嘅減壓方法。
唐雙寧話，公事上諗唔通就會潦草書，寫寫吓靈感就到。
最搞鬼係，不時會有金融界朋友同佢講，有個書法家個名同佢一樣；亦曾有書法界朋友話佢知，有個金融家嘅名同佢一樣，每次佢都會詐儍扮懵反問：「係咩？」