【第三回】縱橫演藝界逾30年的許紹雄，在近日《野蠻奶奶大戰戈師奶》中，飾演汪明荃的鬥氣寃家畢平凡，有傳二人由戲內鬥到戲外，對於被傳不和，許紹雄連聲否認，大讚阿姐容易服侍之餘，更自爆為準時收工而不時借阿姐過橋。 撰文：卓寶花
在近日收視高企的《野蠻奶奶大戰戈師奶》中，許紹雄飾演擅於投資理財、因被朋友連累而坐寃獄的畢平凡，也是阿姐汪明荃劇中的鬥氣寃家。許紹雄和阿姐均是有數十年經驗的資深演員，二人今次在劇中鬥氣鬥戲，擦出爆笑火花。
今次是許紹雄首次正式跟阿姐合作，《野》劇收視好，問他會否覺得叨光，他笑說：「收視呢啲都冇得預計，我當然開心多人睇，可能係喜劇關係，啲觀眾鍾意，你估個巿咁好咩，生活指數又高，仲睇啲慘情戲會好悲㗎！我同阿姐之前都拍過一套《雷霆第一關》，不過冇對手戲，佢拍李修賢，我記得呢套劇收視一般，你估拍住阿姐一定收得㗎咩！都要套劇真係得先可以㗎。」
圈中多古怪人
汪明荃以準時認真見稱，相反許紹雄經常笑嘻嘻，早前有傳二人拍劇不和，指他態度不認真，阿姐多次要求對稿，許紹雄只對一次便算數，又指他不時窒阿姐，氣得阿姐面燶燶，找監製投訴，但最終仍是沒有下文。
對於跟阿姐拍劇鬧不和，許紹雄再三否認，指阿姐並非外傳般難搞，還大讚她很易服侍，他說：「佢份人冇嘢㗎，其實好多圈中人都俾人話古怪，好似馮淬帆同林子祥都係咁，我同馮淬帆都不知幾好朋友，阿姐平時可能俾人錯覺，其實佢服侍番我轉頭就真啦，佢經常都帶食物請大家食，又會叫大家去佢屋企玩，套套同佢拍我都制，因為可以準時開工收工，反而有時啲後生仔女慣咗冇咁準時，不過好彩我呢套劇多數只係拍阿姐，冇遇過呢種情況。」
借過橋早收工
許紹雄承認經常口花花撩阿姐，甚至借她過橋準時收工，他說：「我成日都大叫：『快啲啦，阿姐要開外景。』工作人員以為係真，唔敢拖慢進度，會跳拍晒我同阿姐啲戲先，咁咪可以準時收工囉，不知幾好。」
許紹雄演出喜劇多年，問他如何將搞笑角色發揮得淋漓盡致時，他說：「做乜嘢角色都好，自然啲就會有共鳴，可能我份人本身都開朗，所以嘻嘻哈哈呢啲真係唔難。」
攝影：陳俊強
搶先爆：舊事被揭怒摑媳婦
今晚《野蠻奶奶大戰戈師奶》第12集劇情講述家寶（滕麗名飾）發現O姐（汪明荃飾）即是當年的Fiona後，要求O姐升她為雜誌社主編，O姐聽後大怒，直指她未夠班，家寶為此懷恨在心，向O姐展開報復，暗中讓麗敏（胡杏兒飾）得知O姐乃Fiona，麗敏為O姐當年行為大感羞恥。
O姐其後成為婦女會副主席候選人，婦女會酒會當日，麗敏覺得O姐太虛偽，於是不斷飲酒壓抑怒火，後平凡（許紹雄飾）出現，麗敏見O姐趕對方離開，終忍不住向平凡大爆O姐即Fiona。O姐得知後怒摑麗敏。另一方面，阿Mark（王浩信）認為麗敏可愛，直指戈德（黃宗澤飾）不配麗敏，兩男為此大打出手。
