喺深圳東門起家嘅百貨股茂業國際（848），將會成為今年頭炮新股，皆因嚟緊嘅星期五（18號）就公開招股，公司噚日喺灣仔君悅酒店搞咗個投資者推介會。
家陣啲大陸百貨公司，無論外觀同精髓，都已經可以同東瀛百貨公司睇齊，乜嘢係精髓？咪就係電梯女郎囉。
噚日嘅投資者推介會，就特別安排4位儀態萬千、青春美麗，讓顧客入𨋢時已經「叮」一聲嘅電梯女郎迎賓。茂業主席兼行政總裁黃茂如唔知係咪因為有四美相伴，架勢登場，所以心情靚到不得了。
除咗有養眼電梯女郎，大會安排都算幾有心思，賓架食完晏仲有紀念品攞走，唔係水晶紙鎮、座枱日曆，而係一盒有齊茂業logo同埋手袋、bearbear熊、頸鏈、領帶、cafe等8款圖案嘅迷你朱古力，一次過表達晒公司多元化兼全面嘅服務。