花旗股市升唔代表港股一定要升，已經係呢排嘅定律，昨日再證明一次，港股大跌630點收市，恒指拋離100日線之後，昨日再整多支大陰燭，有排都唔使抽番上去。
睇個勢恒指仲要試25000關，喺嗰個位或會有啲反彈，但係彈完都會跌過，如果喺高位冇走過貨，𠵱家點都要沽啲，而且每次反彈都係減磅嘅時機。對於冇乜貨嘅股民嚟講，低吸嘅時間已漸逼近，恒指低過25000就係收集嘅時間，𠵱家買仲未係時候。至於短炒，只可以吼強勢股，最好有啲地產概念嘅。
太AC輪6954：太A（019）昨收110.90元，逆市升4巴仙，好搶眼，睇呢兩日嘅技術走勢同成交，唔似玩玩吓，應該可以繼續推高，短炒睇122元，可以諗吓隻太AC輪6954，隻輪昨收1.48元，槓桿率7.5倍（有效5.7倍），正股升上122元，6954應該喺2.40元樓上，正股跌穿106.60元止蝕。