港交所（388）連日急跌，走勢積弱，銅鑼灣李小姐噚日推介港交所，不過唔係推介幾時買，而係叫大家齊齊put，仲建議去到190蚊就係時候shortsell佢，直到返番去當年港府入市水平，約140至150蚊先值得再買過。噚日港交所收報184.9蚊，跌6.9蚊或3.6%，兩日累積跌近20蚊。
亨達集團研究部董事黃敏碩話：「當年政府入股應該係120至130蚊水平，短期港交所的確有壓力，但係香港始終有國際金融地位。」李小姐繼續唱淡話：「內地都話發展小康社會，好注重經濟同金融穩定，仲叫海外公司返去上市，又有可能研究炒賣期貨產品，甚至生豬都可能有得炒。」
清咗到期衍生產品或反彈
黃敏碩就認為，呢啲消息內地都講咗好耐，反而要留意新嘅產品幾時推出，同埋「近期有好多衍生產品到期，呢啲清咗之後港交所有機會出現反彈，呢點值得注意！」
孫柏文回想，07年3、4月，當時每日港股成交金額平均約三、四百億，去到年尾就有成二千億，問李小姐預計今年平均成交金額，李小姐就話：「千二至千五億左右。」黃敏碩就話：「如果睇千二至千五億，咁就可以睇得樂觀少少，港交所短期係有壓力，但係shortsell要注意風險。」
孫柏文認為李小姐建議喺190蚊shortsell港交所到150蚊，係噚日嘅最佳貼士，當然要讚下佢揀得好，連黃敏碩都好同意，呢個係一個唔錯嘅建議。
中國人壽（2628）
憧憬內銀入股
港股噚日大跌600幾點，大埔關公推介中國人壽（2628），建議34蚊買入，目標價40蚊，睇升18%。佢解釋：「國壽唔受美國次按拖累，內地宏調對佢嘅影響又唔係太大，聽講內地銀行又話會放寬投資保險股，所以睇好國壽，可以長線投資。」
孫柏文讚關公買入價set得好，佢話：「34蚊係國壽未有資金自由行之前嘅高位，如果嚟緊要反彈，相信亦會喺番呢個位，合乎邏輯。」但佢提醒關公，國壽嘅投資有唔少A股，呢類股票或多或少受宏調影響，令國壽面對一定壓力。
黃敏碩亦補充：「內地銀行投資保險股，未必會咁快成事，關公唔好喺呢方面抱太大期望，而嚟緊股市第一季，有唔少新股嘅策略性股東都會過咗禁售期，可能有人會趁此炒作，興風作浪，投資者要小心。」佢再提醒關公：「最近市場興每日沽一隻主要股份，前日就有港交所（388），國壽好可能成為另一個目標。」
關公建議
建議買入價：$34 標價：$40
止蝕價：$30 時間：長期持有
中交建（1800）
反彈勁博得過
屯門李小姐推介中國交通建設（1800），原因係「每逢大跌市之後佢反彈得勁啲」，佢建議現價21.8蚊買入，20蚊止蝕，一年目標價30蚊，睇升38%。中交建噚日跌0.55蚊或2.46%。
黃敏碩認為，「近期好多股份都打回原形，不過佢做基建，係國策推動，變數較細，一旦內地基建嗌停，對佢影響大啲，如果守得住20蚊，可以考慮走返轉。」
孫柏文就話，跌市時中交建係一隻非常硬淨嘅股票，抗跌力強但係比較貴，李小姐話：「佢手頭上有好多contract（合同）喎！」黃敏碩話早前大摩出咗份報告，睇中交建去到27.5蚊，「大摩認為佢受惠國策傾斜，所以睇好中交建嘅基建同碼頭業務，但要留意佢growth嘅百分比同埋合約定單嘅增長。」
黃敏碩最後補番句，中交建雖然跌穿10天平均線，但仍然企喺20天、50天同100天平均線之上，走勢比好多大陸股「靚仔」；如果去到20蚊，小注入市亦未嘗不可。
中國中鐵（390）
一入即蟹心噏
美孚陳太噚日打嚟講隻半新股中國中鐵（390），話睇好佢嚟緊喺內地嘅基建發展，不過佢噚日朝早喺10.85蚊價位入貨後，𠵱家即刻變蟹貨；佢諗住揸2個月，目標價13蚊，睇升兩成。
中鐵噚日開市走勢幾靚，一度升2.4%，但冇耐就掉頭回落急挫，試過跌成7.5%，落到去9.9蚊，尾市跌幅則略為收窄，最後收報10.02蚊，跌6.4%。陳太見到中鐵單日轉向都有啲擔心，佢話：「如果要定止蝕價，定喺邊個位會好啲？」
孫柏文話：「你有冇睇開我哋嘅節目，我都講過一跌穿10.5蚊就好走。」黃敏頭指：「現時中鐵嘅技術走勢轉差，噚日股價一度跌穿10蚊；一旦股價破咗9.5蚊，就要先走一轉。」不過佢都安慰陳太，中鐵嘅基本因素其實唔算太差，只係受市場氣氛唔好所拖累。
今日嘉賓：英皇證券研究部主管沈振盈
每日收市後4:30pm
歡迎Phonein28698262
http://finance.appledaily.com
想搵名家教路，請登入
http://appledaily.atnext.com/jp/finance登記
成功參與節目者，有機會獲贈禮品，
登記成為「Webcam之友」，更有機會獲得（aastocks）即時報價賬戶
*下午3時半開始，優先接受登記
