民意調查成行成市，其準確性是否必然，大有商榷餘地。鍾庭耀的民意調查為本港八間大學評級，每年都俾嶺南大學饒副校長痛罵一次。最近中大民意調查話七成二市民贊成二○一七普選特首，主持人王家英博士與批評者互相痛批。你話民意調查完全唔準確，係輕視統計科學，但你話民調完全啱晒，當然自欺欺人，好似一月八日美國NewHampshire州總統候選人初選，事先CNN等數大傳媒嘅民意調查都話希拉莉輸晒，奧巴馬贏梗，但結果如何？希拉莉贏咗，39%對36%。
美國做民調咁有經驗，都會失手，搞到傳媒面目無光，紛紛做驗屍分析，死因係女性選民轉向希拉莉，臨時放棄奧巴馬。點解會咁？原來啲男士完全忽略晒女士嘅微妙心理或者不了解女士長期覺得女性被壓迫、被欺負嘅心態。美國女性從艾奧華州一役之後，覺得希拉莉慘敗，在NewHampshire含住眼淚，好值得同性姊妹同情，女性特別覺得（一）辯論時有人話希拉莉把聲音太尖、太高，好多女觀眾感同身受，諗起自己在公司俾男上司叫停收聲；（二）有男人故意為難希拉莉，叫佢熨衫，女觀眾認為係男人對女性嘅極大侮辱，對職業/專業女性好唔公道；（三）奧巴馬對希拉莉講：「你幾受人鍾意（youarelikableenough）」，女性認為口氣帶侮辱性。男人睇唔起女人；（四）希拉莉展示感性一面，想喊唔喊，俾好多男士取笑，女性認為男士一味自大狂、扮嘢；（五）有人批評克林頓在白宮與女見習生萊溫斯基鬼混，希拉莉詐唔知，好有機心，但女性認為有乜理由唔鬧個大滾友，反而指責大滾友嘅老婆？（六）男人惡得耐咯，女性認為如果連希拉莉咁聰明、咁有韌力嘅女人都唔夠男人鬥，一開波就輸晒，女性咪冇晒面？有以上咁多男性、男記者忽略晒嘅因素，希拉莉絕地反攻得勝，奧巴馬有排煩。不過咁，四十歲以下嘅美國女性自細就覺得男女平等，對希拉莉冇咁多「姊妹感情」，年紀愈大嘅女人就好支持希拉莉。我哋香港又點呢？香港選民慣咗選乜太物太，老早知道女人叻過男人，邊度敢歧視女候選人呀。