家陣興講理財投資，精於此道嘅又點只財經界人士或者師奶，唔少公仔箱嘅藝員明星其實都好叻，星爺周星馳就係代表人物，不過華華唔多知，原來無綫嘅吸金王陳豪都好有心得，佢聽日仲會喺記者會度同大家講新一年嘅投資大計。
其實記者會係法巴銀行搞嘅，佢哋嘅股票及衍生產品部，呢，即係前無綫新聞之花趙海珠所屬部門呢，請咗陳豪嚟分享佢嘅投資經驗同理財心得，仲做埋真人show，到時法巴嘅香港股票及衍生產品零售部主管蘇平恩，會幫陳豪分析佢嘅投資大計。
其實，法巴都係想借藝人名氣，推銷吓佢哋嘅產品「ELI合約」啫，明星效應呢類橋，幾時都有吸引力。以珠珠同無綫嘅關係，要搵藝人幫手做賣點，睇怕都會長做長有。