制服界TabletPC<br>護士贏阿標

制服界TabletPC
護士贏阿標

個芒識得轉轉吓又點，唔通萬幾兩萬蚊一部TabletPC，真係要捧住當「神奇畫板」咁玩咩？就算發咗達，打死我都唔會買！踩過界嘅Dell終於為TabletPC殺出一條「新血路」，旗下首部作品LatitudeXT唔止用上超光猛FullLED屏幕，就連Vista未公佈嘅Multi-Touch功能亦唔放過，贏咗阿標（BillGates）一仗！Dell仲講到明要打入專業人士界別，護士、學校阿Sir、地盤管工都啱用，總之有殺錯冇放過！

記者：陳國輝
攝影：楊錦文

Multi-Touch打手印

應該冇人唔知咩叫「Multi-Touch」啩！憑幾隻手指就可以將相片拉大縮小，潮王iPhone都用緊呢種多點觸控技術，想唔Hit都難！冇錯，LatitudeXT的確具備咗，但最弊佢走得太快，連BillGates都未將佢納入Vista分唇之一。LatitudeXT仲具備防手掌誤碰技術，簡單講即係話個芒淨係記認支手寫筆，如果有其他嘢誤碰到個芒（例如手掌），輸入文字時亦唔會受任何干擾。
究竟呢種防誤碰技術有幾勁？大會即場搵咗Model作「打手印」測試：佢先把手掌壓喺屏幕表面，然後用Stylus沿手掌邊畫番個手形出嚟。結果發現，個芒並沒因為手掌壓住而受影響，同時Stylus亦成功地畫到手形出嚟。對經常要處理文件嘅行業如護士、教師等，真係幾啱用喎！

■呢種叫電容式輕觸（Capacitive）技術，與一般電阻式（Resistive）技術分別好大！

■唔係話你知畫手掌好簡單，而係此屏幕絲毫不受其他嘢影響。

■內置Wi-FiCatcher，睇到晒每個Network的強弱值。

FullLED芒唔怕陽光直射

講咗咁耐，大家可能仲未知，其實Dell今次共推出兩款TabletPC㗎！兩款LatitudeXT外觀上同樣採用啞光黑機殼，加上極簡約設計，幾乎餅印咁款。最大分別，係一部厚一部薄，而薄嗰部價錢就相差幾千蚊！嘩，貴喺邊？原來薄機係採用LED技術，曾經聽過有專家話：「一粒LED等於一盞燈！」LatitudeXT解像度達到1,280×800，即係話呢個芒裏面裝咗1,024,000盞燈！唔係誇張，佢之所以比一般TabletPC更光猛，全因為要配合戶外工作人士所需啫！