果真新人事新作風，已經轉咗手畀橙天老闆伍克波嘅嘉禾（1132）噚日宣佈，佢哋同合作咗17年嘅澳洲拍檔VillageRoadshow（澳洲村展）已重拾舊歡，雙方同意放低最近嘅意見分歧，再次攜手搞好新加坡GoldenVillage（GV）嘅戲院業務。不過，可以話一手引發呢件事嘅GV董事總經理KennethTan陳繼賢，就要「請辭」起身，做埋今個月尾byebye。
單嘢係點？事緣嘉禾喺05年入稟高院，要求將雙方合營嘅新加坡Dartina清盤，理由係嘉禾唔妥喺Dartina旗下附屬公司打骰嘅陳生「自把自為」，罪狀包括無理炒高層、私下提高票價，同埋濫用Dartina公司資源等，但個官話清盤申請理據唔充份，單嘢拖到舊年6月，清盤令仍在進行之際，嘉禾再入稟告村展索償，理由大致上都係話拍檔違反合作協議。睇嚟，嘉禾新主波哥，應該係一個極度主張以和為貴，有錢齊齊搵嘅老闆。