有些人，很多事都不會做，卻甚麼都夠膽死講。到了二字尾三字頭，打工打得沮喪了，忽然來了一股拋頭顱灑熱血的勁，定時定候叫身邊的人「今年不如真係一齊搞啲嘢吖」，重複又重複，像宣教一樣，問題是講了之後一直都惟聞樓梯響。連政府也來湊創意工業的熱鬧，不過一輪前奏過後好像又無特別跟進。不過，人地放飛機唔緊要，最緊要自己肯做。07年紅了小克、阿德、b.wing同CarrieChau等CharacterDesigners，08年的江山，大可由夠膽死的他們接力打下去。
記者：梁敦濂
攝影：譚盈傑
場地：G.A.L.lery
Graphicairlines：「城市人真係太過份。」
不能否認，本地插畫/設計人越來越受到重視。Graphicairlines02年成立，兩名創團成員Tat同Vi各有設計語言，但同樣在以EnjoytheVoyage為大前提，為創作而生活，亦為生活而創作。06年開始為多個藝術展覽及大型音樂節作LivePainting，07年更為近40個單位創作，平均每月負責3個不同企劃，又為何韻詩做MV又出Tee，睇嚟08年將會是「設計航空」的豐收年。
因為有志同道合的朋友在場，因為拍攝氣氛良好，採訪當日幸運地看到阿Vi的笑：「我鍾意Dark嘢，因為每一個人都有黑暗面，BeingDarkisanHonesty，這是人的本性，而表達人性其實係我創作嘅原因。」黑暗主調的角色和故事並非阿Vi首創，但如此到肉如此黑色，卻是只此一家。阿Vi創作的主角系列，名叫《阿肥》，角色個個表情欠奉，肥面，四肢瘦，而且絕對醜陋。「城市人生活太豐足了，物資過剩，人人都Over-buy，成日買埋晒自己唔需要嘅嘢。個個廣告都係鼓吹你買買買，信用卡貸款同樓盤廣告多到令人吃不消，我明白社會需要有經濟活動，但有時候我哋真係太過份，買埋晒啲無聊嘢做乜呢，有乜意思呢，呢個包括埋我自己在內。」結果係，物質的堆砌填補不了內心空虛，《阿肥》係吃得飽穿得暖，但係就無日開心過。
Telephone：「我覺得正嘅，就係正。」
Telephone（Tele）為五人中最少發言的一位，年紀輕輕卻針針見血。「設計Character其實係件好個人化嘅事，我覺得正就係正，從來Artist都應該係咁，唔應該跟住市場走。我哋市場細，設計嘅Character用來用去都係Serve某幾種題材，唔似得日本咁，讀者肯接受新嘢，老闆又肯投資，於是乎人哋連整麵包同插花都可以出到本書。」Tele話自己最喜歡貓，而且直覺認為好多人都會鍾意貓，因為貓性格突出，又能夠代表到人的多面性格，「不過如果想流行，就一定要有鮮明性格，夾到個Trend之餘，還要令讀者勾起他們的集體回憶。如麥嘜，說穿了還不是屎尿屁，但就係有集體回憶成份，所以大家會鍾意。」
C#：「政府宣傳片應該搵我哋做！」
做文職的C#，一直以來都沉迷畫畫同玩Graffiti，不過為了生活，他決定不當全職Artist，反而選擇在公餘時另覓時間做創作，在興趣當中嘗試找回那個真正的自己，過程辛苦但非常過癮。「Character索性叫回C#，因為那才真正的代表着自己。C#是一個唔想大，唔想返學，只係鍾意打交玩Graffiti同埋媾女的曳仔！」曳仔明言，香港地跟紅頂白係兵家常事，「MichaelLau紅，於是成班𡃁仔就鍾意，都未搞清楚就已經開始追佢啲Product，點解要鍾意呢，無人會理。佢啲嘢雖然好Commercial，不過每一個Gardener都有好詳細Character，你Study落去會發覺好有樂趣，但如果只停留喺Fans追明星出Product嘅心態嘅話，我哋成個Scene只會越來越落後。其實，想正面啲推動個工業，政府啲宣傳片就唔好淨係叫明星拍啦，搵我哋幫你度Character，首先包你有演技先，仲要唔使煩度期，成件事肯定仲有Noise同Impact！」果然有道理！
San：「我哋無Agent。」
San的畫風帶有濃烈美式卡通影子，雖然作品內沒有太多自我投射，但主角《CrazyBee》動作多多而且表情誇張，並經常與大量潮物一齊現身，屬於土炮Character系列中比較罕見的風格。「香港呢個城市其實已經無以前咁有衝勁，我希望透過《CrazyBee》可以滲多啲Energy出嚟畀個城市，大家都可以Crazy啲。同日本比較，香港可以話無自己嘅Character文化，人哋連說明書都會用一隻Character去講解，不過講真𠵱家已經好過以前好多，如果可以好似歐美國家咁，有多啲專業Agent幫我哋議價同接Job，呢個工業一定會發展得好好多，希望08年會有多啲變化。」
