通常新股搞推介會，都會揀喺酒店搞，熱門選擇有四季、君悅、萬豪咁，貪佢哋又新又大。但噚日搞推介會嘅新福港（301），就特登唔揀呢啲熱門地點，而喺差不多有成50年歷史嘅文華東方度搞。點解？之唔係想畀投資者親身感受一下佢嘅「出品」囉！
華華聽新福港公司啲人話，原來呢家喺1963年開業嘅文華東方，當年就係新福港前身、即係「孫福記」起嘅。
聽講話，雖然文華為咗迎戰新落成酒店，都用咗唔少銀両去執個外殼，但係內櫳就冇乜點搞，證明孫福記絕對「交足貨」。
不如咁啦，下次新福港開業績記者會，又或者開股東會時，就直情喺旗下嗰啲大項目嘅地盤上搞記招，一來可以畀大家感受一下啲項目有幾大幾好，二來又可以慳番場租，幫股東慳錢，一舉兩得，真係好值得諗諗佢喎。