人真是奇怪的動物，食飽飯沒事做，便追求凡事看得更清、更真、更切，其實，大家也知道，大千世界，事物離遠看好看，靠得極近看，好看的並不多。
可能又是DNA作怪吧，兒時已喜歡找來一個顯微鏡，把甚麼草蜢、蒼蠅、樹葉、花蕊，放得大大的端詳一番，彷彿得到極大滿足感，發育時期，同學們隔三幾天便將夢遺子孫儲起，放到實驗室顯微鏡下比拼一番，據聞曾有同學發現其子孫能游蝶背蛙捷四式，傳聞一樁，無從稽考。
在電視台工作時，不喜歡化妝出鏡，當時負責總監全台藝員形象的乜哥經觀察後把我捉埋一二邊對我說：「你唔化妝出鏡呀？𠵱家啲機器好衰㗎，好利㗎，好咗唔覺好，衰咗好覺衰㗎」，「吓？呢啲咁嘅機器要嚟做乜？丟咗佢啦不如。」我下意識即時反應，乜哥料不到得到咁嘅答案，大家呆僵廿秒，乜哥再開腔：「個個都化，得你唔化，咁好覺人哋化，又好覺你唔化個喎」，這段說話充滿禪機，我唯有拈花扮微笑，「OK，大家都化，我化。」
歡迎大家踏入廿一世紀高清時代，電視上經常聽到「高清拍攝」，其實只是攝影機轉用了高清，被拍的並沒有特別為高清而加料，所以該穿崩的特別高清穿崩。觀眾看高清已不只是在看節目，簡直就像在打機玩遊戲，放大女藝員個鼻哥窿或毛孔看看鼻毛是否修剪亁淨及有否蟎蟲為患，茶餘飯後一家人圍埋數魚尾紋，一條、兩條、三條……
有需要看得那麼清、那麼真、那麼切嗎？