沉寂一時嘅房地產信託基金（REITs）噚日忽然發力，西環David乘勢推介冠君產業（2778），佢話：「舊年年尾我已經開始留意呢隻股，甲級商廈嘅租金係咁升，但舊年呢隻股都係喺3.6蚊至4.8蚊上落，仲未反映資產價格同埋租金升值，冠君噚日走勢凌厲，值得追入。」
David建議現價買入，希望3個月可以上到目標價5.5蚊，睇升13%。冠君產業噚日收報4.85蚊，升7.5%，創咗上市以來嘅收市新高，但不得不提嘅係，呢隻股由06年5月上市至今，一直都仲未浮上水面，佢嘅招股價係5.1蚊，計落仲跌緊成5%。
雖創新高 仍潛水
東方匯理衍生產品部董事李靄欣話：「REITs嘅防守性唔使懷疑，噚日REITs板塊上升，主要係反映市況唔明朗下，資金流向防守性高嘅股份，冠君應該仲未完全反映寫字樓價格同埋租金上升等利好因素。」
David仲話：「嚟緊大家都講負利率，國金2期呎租由幾十蚊升到𠵱家180蚊，大家開始留意番REITs，嚟緊冠君實得！」
李靄欣亦睇好冠君喺短期內有機會見到5.5蚊，佢話：「𠵱家市場對甲級商廈需求，已有由中區向外擴展之勢，應該有利冠君持有嘅花旗銀行廣場。」
但李靄欣提醒David：「短期表現仍要視乎整體市況，若市場持續唔明朗，繼續吸引資金流入防守性高嘅股份，反而對冠君有利；相反，若大市回升，呢類股份一定會慢落嚟。」
息率高 防守力強
孫柏文就擔心：「𠵱家次按問題仲未解決，如果問題惡化搞到企業要裁員嘅話，市場對寫字樓需求亦會減少，可能會影響冠君表現。」但佢都認同，冠君股息率同防守性一樣咁高，現市況下都算係唔錯嘅選擇。
王朝酒業（828）
農曆年例升 玩短炒
尖沙嘴溫小姐推介王朝酒業（828），建議現價買入，目標價3.6蚊，2.6蚊止蝕，揸到農曆新年。溫小姐話：「舊年都係過年前升上去，所以短炒到農曆年。」睇番圖，王朝酒自05年1月上市至今，3個農曆年都係大升。
孫柏文質疑王朝酒算唔算係內需股，因為佢之前無跟隨內需股嘅升勢。李靄欣亦話：「好多內需股走勢都唔錯，特別係舊年第四季都見到高位；不過，睇番王朝酒嘅圖表走勢，呢隻唔似係內需股。」
溫小姐就話：「王朝酒都有喺大陸推出王朝葡萄酒㗎。今日上網睇到大陸嘅網站報道，五糧液同茅台都加咗價，仲有大陸人過年送禮多數送酒，大陸人飲酒又飲得好勁，見就嚟過年，香港無乜大陸酒股可以考慮，所以就揀王朝酒囉。」
李靄欣回應：「可能溫小姐睇得啱，但目標價定得太進取，加上純粹炒季節性因素，我建議你睇番舊年過年時，隻股炒到乜嘢時間就炒完，今年都係大概嗰啲時間就放，唔好等目標價。」
中策集團（235）
轉型買煤礦 有水位
觀塘李先生推介中策集團（235），原因係聽到消息，話中策會收購中鐵（390）嘅內地煤礦業務，佢話：「諗住有機會炒上，所以朝早喺1.2蚊入咗貨。」
中策噚日最多急升三成五，隨後升幅逐步收窄，收市報1.11蚊，全日微升0.9%。
孫柏文好奇問：「你知唔知中策做乜嘢業務？靠乜嘢賺錢㗎？」李先生就話：「唔係好清楚噃，只係諗住短炒，家陣股價落到1.1蚊，目標價會睇1.4至1.5蚊。中策上過1.4蚊樓上，諗住1.2蚊入，都有2毫子水位，加上入場費又唔多，5000股一手。」
李靄欣解釋：「炒收購概念嘅股票，好多時資金已經一早偷步入市，投資者追捧呢類股票，要睇番早幾日嘅股價走勢，可以睇多兩日先入貨，如果表現唔好，又少資金追入，再炒上去嘅可能性就唔大。」
事實上，中策主業本來係產銷電池及相關配件，另外亦有投資證券；𠵱家買咗中鐵成4個煤礦，相信可以加快向天然資源行業轉型嘅步伐。
滙源果汁（1886）
炒內需 貪佢夠穩陣
大埔關公話個市波動咁大，但又手痕想入貨，所以揀咗隻滙源果汁（1886），推介原因係「貪佢風險無咁大，比較穩陣少少」。關公建議現價買入，目標價10.5蚊，8蚊就止蝕，睇半年。滙源噚日收市報8.44蚊，逆市升0.72%。
李靄欣話：「個價貼得幾好，最近大家都係炒內需股，或者唔係太受大陸宏調影響嘅股份，滙源係其中一隻值得炒嘅內需股，比起其他內需股時升時跌，滙源相對穩定好多。」
關公話：「唔掂個市唔舒服，睇番滙源上年7月到10月，都喺10蚊左右徘徊，可以維持到𠵱家，如果揸到夏天就會有盈利增長。」孫柏文讚關公止蝕價定得好，但提醒佢要嚴守8蚊止蝕。
-關公建議-
建議買入價：$8.44 目標價：$10.5
止蝕價：$8 時間：半年
港交所（388）
$170分段吸 睇長線
西貢黃先生推介港交所（388），佢話：「呢幾日港交所係咁跌，相信係技術調整，因為上年實在升得太多，但長線仍然睇好呢隻股，因為港府話過會大力發展金融業，加上又有中央政府支持，港股直通車遲早都會『通』，𠵱家港股每日成交額都唔係太差啫。」黃生建議喺170蚊分段買入落重注，港交所噚日急跌12.4蚊，收報191.8蚊。
李靄欣話：「噚日港交所跌得咁勁，聽到嘅消息係因為有大戶沽貨，引發連鎖效應；再加上最近有唔少窩輪到期，佢哋嘅現價同行使價有一段距離，促使輪商減持正股，令港交所出現沽壓。」黃先生就話：「除非港府或者中央嘅政策有變，唔係嘅話，港交所唔會差得去邊。」
-黃先生建議-
建議買入價：$170左右分段入 目標價：－
止蝕價：－ 時間：長期持有
今日嘉賓：亨達集團研究部董事黃敏碩
每日收市後4:30pm
歡迎Phonein28698262
http://finance.appledaily.com
想搵名家教路，請登入
http://appledaily.atnext.com/jp/finance登記
成功參與節目者，有機會獲贈禮品，
登記成為「Webcam之友」，更有機會獲得（aastocks）即時報價賬戶
*下午3時半開始，優先接受登記
