無綫主辦的《2007年度十大勁歌金曲頒獎典禮》賽前賽後都是非不絕，前晚眾歌手無論贏家輸家都要在紅館坐一整晚，大贏家陳奕迅、李克勤、容祖兒及Twins等，之後捧着獎座雀躍地到尖沙嘴出席大會慶功宴，尤其祖兒與Twins更十分興奮，事後為與歌迷開香檳，座駕在金巴利道停車及慢駛，慶祝大過天。
輸家楊千嬅及古巨基各有態度，千嬅以生病要睡覺為由缺席慶功宴抗議，反而基仔則大方出席，還以打牌論英雄，他說：「牌品好人品自然好，新一年從頭打過東圈囉。」
採訪：李珮洳、馬建華、林惠卿
攝影：林德雄、陳偉權、陳順禎
-輸家失蹤-
楊千嬅與古巨基前晚均只得一個金曲獎，與大獎無緣，成為《勁歌》輸家。雖然千嬅前晚在頒獎禮上玩得興奮，見陳奕迅得男歌星大獎還走上前伴舞，但頒獎禮完結後，她與所屬的AMusic唱片人員均缺席慶功宴，似乎對賽果甚感不滿，坐了整晚冷板凳的鄧麗欣也缺席。
基仔自詡有牌品
千嬅經理人公司紅館負責人管小姐前晚說：「千嬅約咗人飲嘢，個騷delay咗，佢走時都成12點。」事實頒獎禮並沒有超時，千嬅昨日也準時出席港台頒獎禮，她解釋說：「之前感冒未清，唔係太舒服，我同公司話完咗騷要返屋企休息。」
提到她與經理人口供不夾，千嬅說：「係約咗周公，全公司都知我病咗一個星期，經理人都知，可能現場太亂聽唔清楚，我好投入喺頒獎禮入面，盡咗做歌手責任，希望大家欣賞我嘅體育精神，重點係支持樂壇，慶功唔去唔係重點。」
此外，同樣是輸家的古巨基前晚大方出席慶功宴，他說：「我用打麻雀嚟比喻，打牌最緊要打好自己份牌，食糊要睇天時地利人和，有時叫三飛未必食得出，可能卡窿反而食出。牌品好人品自然好，我兩樣都好，人哋食糊我戥人開心，新一年從頭打過個東圈囉，最緊要打好鋪牌同有得繼續打。」談到勁敵陳奕迅得兩大獎，基仔說：「我會戥佢開心。」
-贏家忘形-
容祖兒成為《勁歌》最受歡迎女歌星五連霸，Twins又得亞太區最受歡迎香港女歌星獎，泳兒憑《無心戀唱》入十大金曲，新人林峯、洪卓立及鍾舒漫都有獎，英皇唱片共得10個獎，前晚出席慶功宴時，現場所見，他們比得12個獎的環球唱片更意氣風發，眾人以碗盛酒來飲勝。
離開慶功會場時，祖兒先與歌迷開香檳慶祝，然後步上保母車，其座駕在尖沙嘴慢駛，祖兒則站出天窗揮手及開香檳，尾隨其後的車被阻擋去路不停響按，有警察上前勸喻祖兒司機盡快駛離，而祖兒開完香檳才離開。
到Twins離去時，二人的座駕向前駛了一段路後，在雙黃線違例下車，與歌迷飲香檳慶祝，警員雖未有開告票，但仍勸喻她們快點離去免阻塞交通。
祖兒望盡攬大獎
祖兒在慶功上表示最可惜其母沒來看她領獎，問她會否怕被指故意將亞太女歌星獎讓給Twins，她說：「心水清嘅人都知Twins喺大中華市場好好，我會努力攞呢個獎，我要請同事去海南島。」
昨日祖兒在港台活動上被問到在三個頒獎禮上都得女歌手獎，只欠港台優秀女歌手獎，她說：「如果再得我會好開心，會請晒所有同事食飯，學千嬅講有獎唔會嫌多，有人支持就好足夠。」Twins的蔡卓妍（阿Sa）前晚則說：「亞太冇試過組合攞，個心跳到癲咗。」
花絮：王菀之一吻泯恩仇
前晚無綫擺烏龍，錯將張敬軒的傑出表現獎金獎頒給王菀之，令已經上台說謝辭的王菀之尷尬不已。監製陳家揚完騷後特別召開小型記者會，他說：「本人已經代表TVB向兩位歌手道歉，賽果今日先知，幕後同事黐錯名單，咁多年嚟都未發生過咁嘅錯，我哋會檢討，出年唔會再發生。」王菀之在慶功宴上說：「我入行以嚟，呢個頒獎禮係令我有最多回憶同感動嘅一個，意外冇人想㗎，我賺咗歌手畀我鼓勵。」其後還親吻了軒仔，而軒仔則謂：「Liveshow出錯係難免，我好開心同王菀之咁有默契。」
花絮：林峯稱聽唔到噓聲
林峯因無綫旗下藝人身份，又將最受歡迎男新人金獎捧走，領獎時現場部份歌迷發出噓聲，前晚他在慶功上說：「我聽唔到，只聽到啲歌手叫，多謝佢哋好錫我，我真係聽唔到噓聲。」林峯謂參與頒獎禮有少許壓力，他說：「我喺呢個圈唔算係真正新人，樂壇先係，上台攞獎時成個人放鬆晒啦。」
花絮：陳奕迅飲高層口水
無綫高層樂易玲與何麗全前晚在慶功宴上走到環球系唱片一席敬酒，陳奕迅見桌上沒飲品大叫：「冇嘢飲呀！」樂易玲竟將自己的啤酒遞給他說：「飲我嗰杯。」二人你一口我一口同喝一杯酒。樂易玲向Eason、克勤及軒仔逐一敬酒後，忽略在旁的鄧健泓，走了幾步才回頭向他補敬酒，Eason見狀說：「喂，親生仔快啲同人碰杯，飲勝啦！」令鄧健泓頗尷尬。得兩大獎的Eason又不停感謝劉德華，他說：「佢唔嚟令我得獎機會大咗，其實亞太個獎好多人都有機會，攞獎係緣份。」
克勤表示全晚都很開心，但他說：「冇咗亞太個獎，話冇唔開心就假嘅，點都有啲失望，但有喜出望外，好似坐過山車咁，今年冇咗劉德華有啲失落同唔慣呀。」
花絮：冇品歌迷挑起糾紛
前晚慶功宴會場樓下聚集近300歌迷加圍觀市民，維持秩序的警察則有逾20名，當眾星都到達後，現場忽然有歌迷大叫：「楊千嬅收皮。」即時引起兩幫歌迷激烈爭吵，要由警方介入調停才平息紛爭。千嬅昨日得悉此事後說：「咁堅？好似無間道。年輕人之間嘅誤會，相信唔係鬧交，小朋友有自己情緒，大家唔好咁介意。」
娛論：本末倒置雞肋獎變主菜
無綫的《勁歌》頒獎禮為現場直播節目，節目內容的質素與娛樂性直接影響收視，近年無綫似乎因收視壓力，忽略頒獎禮要鼓勵歌手的真正意義，此情況在前晚頒獎禮上明顯之至。一向以來最受歡迎男、女歌星獎才是歌手的終極目標，亞太區最受歡迎香港男、女歌星反如雞肋獎，但今年陳奕迅與容祖兒屬男、女歌星大熱，事前人人估得到，賽果毫無驚喜，反而亞太區男、女歌星獎因劉德華及陳慧琳缺席被迫易手，眾候選歌星又沒有一個特別突出，獎項花落誰家惹來不少揣測，無綫為增加緊張感，故意將該兩獎安排在最受歡迎男、女歌星後才頒發，情況如電影頒獎禮先宣佈影帝影后，男、女配角獎反而放在最後頒，可謂本末倒置。
其實無綫頒獎禮的弊處不少，歌手不出席便失獎，連劉德華也沒情講，未夠班的被硬谷上位，賽制有欠公平，無綫親生仔獲厚待，造成林峯與鄧健泓前晚領獎時慘被喝倒采，可謂愛你變成害你。
撰文：丁寧
一網講盡：網友轟TVB厚待親生仔
《勁歌》頒獎禮前晚圓滿結束，網友例牌留言炮轟賽果不公，矛頭直指無綫親生仔林峯和鄧健泓。
47904790（Uwants討論區）：
覺得造馬都唔好咁出面囉，頂多畀佢（林峯）銅獎咪算。
imbakasa（香港討論區）：
真係聽都未聽過呢條友（鄧健泓）唱歌囉，點傑出，點受歡迎法我想問？
次紫（Uwants討論區）：
裕美有咩歌？不是吧，我真的不知道她派過甚麼歌！
護龍使者（Uwants討論區）：
hotcha攞組合銅獎？當農夫冇到？真係超無奈囉，hotcha冇可能有組合銅獎囉！
漏網之圖
