第一回
年前胡杏兒曾增肥40磅拍攝劇集《肥田囍事》，但她拍攝《野蠻奶奶大戰戈師奶》期間，竟於兩月內激瘦10磅，飾演警花的她，在劇中身陷重圍，四面楚歌，受盡奶奶汪明荃白鴿眼，又要忍受老公黃宗澤軟皮蛇，更要面對狐狸精楊秀惠的挑釁，令她屢被激到嘔血，幸劇集推出後口碑收視雙贏，故她笑言：「瘦多10磅都抵呀！」 撰文：朱倬誼
胡杏兒在劇集《野蠻奶奶大戰戈師奶》中飾演粗魯警花「周麗敏」，愛上任職時裝雜誌社、事事不爭氣的「戈德」黃宗澤（Bosco），生性野蠻的戈德母親「戈碧」汪明荃（阿姐）又老是與她大鬥法，戈德舊愛「宋芷喬」楊秀惠更擺明硬搶她的老公，杏兒加入雜誌社又被職員玩殘，不少場面都令她激心激氣，難怪她拍攝時竟激瘦10磅。
返工變身哥斯拉
杏兒表示拍劇前其體重為115磅，拍劇後剩105磅，創其體重新低，日前杏兒接受記者訪問時說：「我記得有啲戲講我一返公司就變哥斯拉，想噴火燒晒啲人。嗰時拍戲都𤷪，都辛苦㗎，日日開工十幾廿個鐘，個人好瘦、好攰，要記好多對白，又作病，都要死頂，戲裏戲外都要撐，又要培養情緒喎，因為奶奶唔鍾意我，老公又唔爭氣，公司啲人仲要踩到我上心口。」
狐狸精楊秀惠出場後，奶奶阿姐居然接受她多過自己的新抱仔，更令杏兒激到嘔電，她說：「楊秀惠嘅表現出人意表，睇到人牙癢癢，但個角色唔乞人憎嘅，佢有佢道理，以前佢被阿姐趕走，到讀完書返嚟，對Bosco仲有意思，咪搶囉，擺到明踩上門，我四面受敵㗎！」
猶記得年前杏兒演《肥田囍事》時刻意谷肥40磅，體重高達152磅，沒想到拍攝《野》劇又體重急跌，幸好劇集收視高企，平均獲207萬名觀眾捧場，難怪她笑道：「出到嚟收視口碑好，瘦多10磅都抵呀！」
戇直儍妹學儀態
對於周麗敏這個角色，杏兒直認難演，她說：「因為性格唔係好鮮明，唔係好巴渣、好惡，係儍更更，由一個粗魯、戇直嘅女仔，因為愛情而接觸好多從未做過嘅事，開始高品味、有儀態。佢好愛老公，唔想老公變磨心，但又頂唔住奶奶橫蠻，角色拿揑要準，唔可以太誇張，太過份會令觀眾唔信服，亦唔討好。時裝版講嘅唔單止係婆媳之間嘅情，仲有夫妻同母子感情，係少一分胡鬧，多一分感情。」
杏兒續說：「周麗敏有好多成長嘅地方，佢有時唔知自己要乜嘢，愛情令佢盲目，係幾啱啲人反省，有啲人盲目討好奶奶、老公，做一啲唔適合自己嘅嘢，因為咁而冇晒自己，會弄巧反拙，同社會現實都好相近。」
攝影：林德雄
化妝：ZoeFanofBeautyTech
服裝：DONNAKARAN
髮型：KelFungofDoubleH
場地：SpassoItalianbar&restaurantofTST
搶先爆：O姐訛稱Fiona已死
今晚《野蠻奶奶大戰戈師奶》第10集的劇情，講述O姐（汪明荃飾）以找到畢平凡（許紹雄飾）仇人「Fiona」下落作條件，要求平凡接受雜誌社專訪，結果平凡憑這篇專訪一炮而紅。之後O姐向平凡稱Fiona已身故，平凡頓覺復仇無望生無可戀，後在O姐勸導下大為感動（圖）。
麗敏（胡杏兒飾）自上海公幹回來後即進行大變身，令公司上下眼前一亮。平凡其後苦纏家寶（滕麗名飾）追問Fiona下落，幸得仲祥（郭政鴻飾）出手相救，家寶因而對仲祥產生好感。麗敏得知家寶對祥有好感後，為家寶四出查探祥是否同性戀者，最後竟查出祥曾婚姻失敗，更育有一對孖女。
