【上海直擊】周杰倫同侯佩岑、S.H.E.成員Hebe以及蔡依林三個前緋聞女友，噚日齊齊現身上海舉行嘅「第2屆中國移動無線音樂年度盛典」，雖然周杰倫同侯佩岑被傳分手後曾經有幾次一齊出席活動，而侯佩岑同蔡依林喺舊年金曲獎又試過同台出現，但好似噚日3個緋聞女友同周杰倫喺同一個活動出現，真係前所未見，備受注目嘅程度，真係仲好睇過頒獎禮賽果。
獲最高銷量獎
不過，喺大會巧妙安排下，4位緋聞男女都成功避開對方，例如大會安排佢哋唔同次序行紅地毯，令佢哋唔使撞口撞面引起尷尬。究竟蔡依林有冇同周杰倫打招呼？蔡依林經理人話：「Jolin（蔡依林）從來沒有要避誰，這是內地EMI安排的通告，我們就去參加。」而侯佩岑經理人就話：「有遇到再說。」
至於噚日頒獎禮周杰倫獲最高銷量男歌手等4個大獎，成為大贏家，而蔡依林除獲頒最高銷量女歌手等3個大獎外，又獲邀擔任表演嘉賓，明顯較侯佩岑和Hebe風光。
採訪、攝影：盧健
