𠵱家足球壇越嚟越污糟，我求大俠想講嘅已經唔係大路嘅假波案，而係球員自己本身嘅衞生問題。入完波開心慶祝係人之常情，但係如果好似曼聯嘅泰維斯咁，喺條褲襠拎個奶嘴出嚟啜，真係好鬼「嗱喳」囉！不過佢「弗」吹佢唔脹，上周六大炒紐卡素冇份入波嘅朗尼，要快啲學吓喇！
餿味好難受啫
其實球員收埋啲具特別意義嘅物件，留番入完波之後拎出嚟慶祝，呢啲動作雖然唔係新聞，不過我求大俠越睇越覺得唔對路啫。試諗吓，嗰樣物件基本上可以收得去邊吖，一係好似前富咸嘅阿根廷前鋒沙華咁，收個黑俠梭羅面具喺對襪度；一係就好似泰維斯咁擺喺褲頭度囉，唔通成件收埋喺條底褲入面咩？
之但係咁，衞生幫又唔會捉佢哋嘅，球員自己鍾意污糟唔得咩；不過大家諗吓，班球員啲汗「噏」咗咁耐，又唔知幾時先入到波喎，跟住再含番個充滿汗味（可能仲有啲濕）嘅奶嘴，嘩！都唔知有冇餿味啫！難得泰維斯唔嫌污糟，近排又係咁入波，我諗領隊費Sir同佢自己都唔怕繼續「嗱喳」嘅。
高治跳機械舞夠衞生
我求大俠就唔主張收埋啲嘢喺襪或褲頭度喇，好似利物浦前鋒高治咁跳吓機械舞，學吓愛華頓中場卡希爾喺角球旗打吓Boxing，都不知幾咁有創意，話晒呢啲動作都衞生啲嘛。
泰維斯呢排咁「弗」唔知關唔關個奶嘴事，啱啱大炒紐記6:0冇份「士哥」嘅朗尼，睇怕要快啲同未婚妻高蓮落力「造人」喇，到時同泰維斯齊齊啜住個奶嘴，睇吓邊個入得波多啲！