雖然十姑娘對澳博上市好多意見，不過賭王何鴻燊未驚過，噚日同三太陳婉珍出席一個中國藝術品展銷會，一出手就用200幾萬掃咗三件貨，分別係陶塑大師劉澤棉嘅《大八羅漢》，國畫大師齊白石嘅《紅梅喜鵲》同徐悲鴻嘅《立馬》圖，賭王仲即席揮毫，教八方畫雀㖭！
賭王：畫鳥先畫嘴
賭王話細個讀卜卜齋時，老師係翰林學士，教佢書法同國畫，𠵱家仲記得口訣：「畫鳥先畫嘴，眼向上唇安。」佢邊講邊畫，一隻雀就躍然紙上，天邊畫多兩隻雀仔，加多個太陽大功告成。賭王問在場記者：「係咪好似先？」賭王真迹難得一見，八方唔敢亂咁評論，大家自己睇。
同賭王比較，胡應湘夫人郭秀萍學畫就遲得多。佢1981年起師從齊白石徒孫、國畫老師林逸之，作品似模似樣。同賭王相反，胡太話最怕畫雀仔，因為局限太大，畫山水就揮灑得多。胡太噚日佢同一班師兄弟舉行聯展，原來同門包括公民黨余若薇兩母女。
余大狀話習字都係因為從政，事關佢係黨魁，要隨俗喺年宵市場幫市民寫揮春，為免獻醜就拜師學藝。林老師盛讚余大狀天份奇高，習字短時間已寫得唔錯，手字剛強有勁，甚有個人風格。Audrey噚日一襲黑色唐裝、佩戴白玉吊墜出場，好有大師台型。
