好羨慕徐子淇嘅香港女士請注意，八方今日有個重要消息宣佈，由富豪第二代組成嘅「百仁基金」噚日正式宣佈成立，佢哋講到明想擴闊朋友圈子，唔想出嚟玩時撞口撞面都係同一班人，大家遲啲有機會同呢班鑽石王老五做網友，如果咁好彩俾佢哋睇中，仲有機可以慢慢發展。
呢個基金𠵱家有40幾個成員，個個非富則貴，包括四叔兩個仔家傑、家誠，九倉吳光正個仔吳宗權、東亞寶哥哥兩個仔民橋、民斌、信置黃志祥個仔黃永光、彤叔乖孫鄭志剛、岳少兒子林孝賢、大劉個仔劉鳴煒等，連愛蒲嘅霍啓剛都加入，仲有一班老牌愛國商人之後，份量十足。
不涉政治只做善事
創會會長李家傑話，年幾前構思成立一個慈善組織，由於成員要出錢出力，最初要畀50萬元入會投入基金，但反應一般，後來減至5萬蚊有交易先慢慢湊夠人數，至於𠵱家基金有幾多錢，佢唔肯透露。
富豪第二代唔係普通人，思維好新鮮，強調基金不涉政治，想做非一般慈善工作，遲啲會搞個網站，成員做版主，有需要人士可以將自己苦況、要求、申訴上網，佢哋睇到又認為值得幫就會伸出援手。其實呢個基金唔係得男成員，羅寶文、蔡加敏、霍思緯等「波場」常客都已落叠。
八方問家傑，係咪一定要家底厚先有資格做成員，佢話錢係其次，最緊要有心，現時成員系出名門，係因為大家屬同一圈子，「我哋都想擴闊啲，多啲人做善事，唔好小圈子運作。」
打通大陸投資脈絡
有個掹車邊知道基金內情人士同八方講，呢班富豪之後行埋，緣於近幾年佢哋獲安排上京參加國情研習班，學嘢為名，北京統戰為實，因為佢哋伯爺多數由鄉下去香港，對國家有感情，第二代讀番書，所以要多認識國家；搞咗幾次研習班後，非正式咁有個「同學會」，有人想搞大佢，就成立呢個基金。
呢位人士又話，華資富豪喺改革開放之初已投資內地，打通大陸官商脈絡甚至直達天庭，但呢啲累積十幾廿年嘅人脈資本，未必可以全部傳畀接班人，所以近年急於幫佢哋鋪橋搭路，呢個基金算係個上位「平台」。有政界人士分析，本地富豪多利益衝突，幾大家族明爭暗鬥，第二代合作會唔會雷聲大雨點小，遲啲就知。