八字生得正，沙頭角出世都可以搬上山頂。呢句順口溜，係八方噚日同港產倫敦飲食大亨AlanYau邱德威食完tea之後嘅頓悟。客家圍村仔Alan出身草根，父親幾十年前飄洋過海去倫敦洗大餅，留低佢喺沙頭角打滾。Alan讀書唔叻，小學考試唔及格，偏偏長大之後出人頭地。箇中玄機，就係條命夠四正，命中有條大運河，水源滔滔不絕勁過東江水。
向老友父親借錢創業
Alan接受《蘋果》訪問時自爆，為咗掘第一桶金，30歲嗰年膽粗粗抵押屋契兼向朋友度水，撲咗廿萬英鎊創辦日本拉麵店Wagamama，八方深入考究，發現背後仲有段古。據稱Alan向其中一個朋友借錢，呢位老友面有難色，表示自己唔話得事，要問准老父。
佢朋友話父親篤信命理玄學，要求Alan畀時辰八字過目，睇完再傾，咁講法，係人都打定輸數啦。點知唔睇猶自可，一睇就嚇親朋友尊翁。原來世伯算出Alan命水非凡，普通人勤勤懇懇打工，成世人財運細水長流冇乜變化，但係Alan財運「條水」卻波瀾壯闊，世伯認為佢非池中物，即刻開「行」大水喉，只要Alan開聲一定冇托手踭。
退休後寧願移民泰國
Alan自言唔迷信，乜原因都好，總之好感激呢位世伯助佢創業。八方唔使睇佢八字都知，佢命中肯定多貴人，而且越嚟越勁，否則點會獲中東財團睇起！Alan篤信佛學，十分虔誠，間唔中會去泰國拜佛。好多香港人都拜佛，Alan指港人正式臨急抱佛腳，上香拜佛一係求財，一係就望子成龍賺大錢，好勢利；泰國人卻只求侍奉我佛，所以佢好欣賞暹羅，日後退休寧願移民泰國，都唔返香港養老。
Alan年輕有為，肯定冇生壞命，否則Wagamama都唔會開業六年，就有龔如心同維珍大老闆布蘭森（RichardBranson）爭住收購。不過呢，佢就嫌自己改壞名，佢中文名叫邱德威，諧音係「有得威」，讀落都幾有氣勢，點知成日俾人玩，細個就讀沙頭角山嘴公立小學，有次英文考試唔及格，阿Sir當住同學面笑佢：「邱德威，呢次你冇得威喇！」都話寧欺白鬚公，Alan終於「有得威」啦。