俗稱「腳痛辦」嘅前任行政長官辦公室舊年啓用，聽日舉行第一次公眾開放日，八方睇咗行政署嘅介紹短片。老董辦公室佈置特點係有多張巨型梳化，擺滿佢同各國政要合照，另有間「吉」房預留畀煲呔幾年後用。
「腳痛辦」位於堅尼地道28號，1905年落成，係三級歷史建築物，以前係住宅同學校，最出名係回歸前做中英聯合聯絡小組會議場地，中、英官員喺入面密斟，決定香港前途。由於呢幢建築物有成百年歷史，承重力有限，所以每一輪最多只容納80人參觀，大樓二樓更只可同時容納最多20人，當局特別提醒參觀者，行經條木樓梯上二樓時要放輕腳步，可能驚大家踩冧條陳年樓梯。開放日朝10晚5舉行，詳情可參考行政署網頁 http://www.admwing.gov.hk