農曆新年就快到，好多市民都會去銀行換新銀紙準備封利是，環境局局長邱騰華噚日出席一個環保活動時，就叫大家注意環保，盡量用舊銀紙派利是。
邱騰華話金管局每年都要印製三億張新紙幣，要用400噸棉花，如果市民唔用新銀紙封利是，可以慳番啲，佢又話最好利是封都好似環保袋咁循環再用，希望市民養成用舊利是封、用舊銀紙封利是嘅習慣。
講環保叻過「慳妹」
邱騰華已婚，唔知會唔會以身作則，八方問已婚同事會唔會響應局長呼籲，人人聽完都話用舊利是封貪大吉利是咩，再講就今年唔派利是畀八方。八方唔介意收舊利是封利是，最緊要有心同有「餡」啫，利是「餡」又唔食得唔怕過期，舊都唔怕，面值最重要。
邱騰華噚日大談節約環保之道，佢話唔一定要添置新電器、家具迎新年，應該有需要先更換，最好買節能或慳電功能產品，舊電器可以捐畀志願機構回收，減少浪費。噚日個活動上，玉女掌門人、「慳妹」周慧敏都有到場，邱騰華猛講慳家之道，講埋慳妹嗰份。