足球、跑馬興三冠王，錦鯉都有三冠王，佢就係今年8歲嘅日本錦鯉女「合子」。合子噚日喺九龍公園舉行嘅第23屆香港錦鯉品評會上，連續三屆奪得全場總冠軍。主人鄭國貴話，合子已經亭亭玉立，係時候退役搵番主好人家開枝散葉。大家要欣賞合子嘅風采，今日喺九龍公園係最後機會。
一條錦鯉點為之靚？鄭國貴話同欣賞靚女冇分別，身形要夠豐滿均勻，唔可以大肚腩，胸尾鰭要夠粗壯，魚鱗要整齊。其次係顏色要鮮艷，好似合子屬錦鯉中嘅「紅白」色種，紅色要夠紅，白色要夠白，唔可以帶黃。
身價料過百萬
鄭國貴成為錦鯉癡已經廿幾年，五年前佢喺日本邂逅合子，當時合子已經係日本關東地區冠軍。鄭國貴一見鍾情，花咗近70萬港元將合子據為己有，近年帶住合子喺中港兩地參賽，多次奪得后冠，如今身價隨時過百萬港元。不過，鄭國貴話養錦鯉係燒銀紙嘅嗜好，佢𠵱家喺南海租魚場養住200幾條錦鯉，水電同飼料每月花費二萬幾蚊，隨時貴過養人。
煲呔都有玩錦鯉，香港錦鯉會副會長列應揚話佢冇入會。有會員同八方講，玩錦鯉會上癮，隨時越玩越貴，佢估計煲呔可能驚俾人話佢浪費、奢華，所以唔敢造個大魚池，買魚都要忍手，魚與特首，不可兼得。