玖源（舊股8399，新股8042）幾壇大動作，非常爆炸，玖源肥過肥仔水。玖源前年進行合成氨技術重建計劃，估計技術重建可以降低成本1200萬銀（人仔．下同）。呢筆數，已經係集團06年度純利嘅41%。廠房經過上年磨合期，成本減省應該可以全面反映。當一切不變，單係成本減省，玖源08年度純利來回已經可以上到4000萬銀，PE跌到9倍幾。又玖源新建年產30萬噸青島複合肥廠，上年下旬正式啓動，呢期農產品價格起飛，加強農民耕作積極性，玖源食正大趨勢，連增產收益提升，玖源PE進一步跌到7倍幾。化肥股當中，玖源平到爆。
再講，玖源呢期計劃收購四川磷礦，蘊藏量高達1億噸，協議收購價3億銀，除番每噸都係2.6元，家陣每噸磷礦石市價，係講緊100蚊。收購順風順水，玖源肥仔水。以玖源08年度12倍PE做目標，價見0.245元，現價（0.149元）潛在回報率64%。
長城科技銀彈充足
長城科技（074）最新每股淨現金貼近1.4元，係現價（2.38元）58%，加埋P/B企喺1倍樓下，呢隻超級現金牛，避風力應該有番咁上下。又長城對上阿爺又係直屬國資委嘅電子信息產業集團，長城獲阿爺眷顧注資，又或者遇到好項目，長城揸住咁多銀彈，應該有足夠彈藥，進行業務併購。
呢轉短打，博長城上番NAV3蚊，現價（2.38元）潛在升幅26%，已經有魚有肉。
錢雋