強積金主席范鴻齡上任後，「出口術」批評受託人收取管理費好貴，之後受託人逐漸減價，打工仔血汗錢唔使俾人陰得咁亁。佢噚日喺香港電台節目《香港家書》入面話，隨住強積金筆錢越滾越大，相信減價潮陸續有來。
強積金俾人詬病由老闆話事選擇基金，打工仔有份供冇份揀，范鴻齡話如果立法會通過佢哋建議，第日打工仔可以每年一次自由轉移供款，估計有六成強積金資產可以咁做，選擇更高回報嘅投資產品。
佢又話當局已不斷修例，防止老闆逃避供款剝削打工仔，積金局對付無良僱主絕不手軟。好多人認為強積金先係剝削打工仔萬惡之源，唔知可以搵邊個幫手對付積金局呢？