豬肉頻頻加價，師奶行街市買餸牙痛咁聲，消委會總幹事劉燕卿好正義，噚日喺電台公開表示，會研究超市有冇壟斷豬肉供應，又質疑生豬買手訛稱供應量大減，亂噏嘢可能擾亂市場運作，隨時嚇親市民恐慌搶購。
生豬買手聽到後鬼殺咁嘈，鮮肉大聯盟理事凌偉業反駁劉燕卿知少少扮代表。佢話豬肉加價，主因係五豐行供應減少，供不應求價錢自然抬高，買手都係受害者，批評買手誤導市民有冇搞錯！
大聯盟聲言會出信要求劉燕卿道歉，唔畀個交代唔排除有進一步行動。豬肉行總商會副理事長許偉堅都話，對劉燕卿言論感到失望同遺憾。好多市民覺得生豬行業透明度不足，八方支持消委會深入了解，維護消費者利益。