自由黨副主席周梁淑怡最近放盤賣山頂崑盧複式物業，唔係嫌風水差，而係因為豪宅有價有市，佢開價1.08億元，如果賣到呢個靚價，估計周太一鋪勁賺一個開。
老公炮製「獨家」複式
崑盧位於山頂加列山道，屬山頂區少有多層式大廈，只有24個單位，最大賣點係有開揚半山景同南區全海景。周太99年搬入，一口氣買入上下兩層相連單位，佢老公周明權係建築師，據講親自出馬入則申請打通兩層自製複式，應該係大廈唯一複式單位，所以特別矜貴。
根據資料，周太當年買入價約2,700萬元，呎價大約10,000蚊，兩個單位夾埋都係5,000幾萬元，𠵱家開價逾億，平均呎價逾20,000蚊，若然做到呢個好價成交，周太就勁賺一倍。有熟悉山頂物業行情者同八方講，由於崑盧甚少放盤，加上周太個盤係「獨家」複式，以現時山頂物業市道走勢睇，呢個盤好有可能做到個好價成交。
據了解周太已遷出單位，𠵱家租用其他地方暫住，周太友好同八方講，住咗多年「柏文」，周太可能換間屋住，睇啱邊度就唔知嘞。