昨晚《十大勁歌金曲頒獎典禮》塵埃落定，猶記得當年安仔一語「廚房宣言」，搞到大家眼濕濕，但講Warm，剛推出DVD嘅《美味不設防》亦唔輸蝕！咁啱得咁蹺，題材又係講一段發生喺廚房入面嘅戀愛故事，劇情溫馨之餘，觀眾更可在BonusTrack見識一下何謂真正法國廚藝。想感受荷李活版本嘅「廚房宣言」？就記得買嚟睇睇喇！
記者：陳國輝
嘉芙蓮薛達鍾絲 唔夠索
女朋友買得呢隻碟，都係想喊一大輪以求達到目的。身為男友，當然要識做：肩膊侍候、陪伴左右，若以睇索女嘉芙蓮薛達鍾絲嘅心態去欣賞《美味不設防》，一定令你失望！全片近100分鐘，幾乎都穿上白色廚衣，想性感都難，但戲內嘅佢性格硬淨又感性，就算固執起嚟個樣都依然迷人；而男主角艾朗艾克亦一如法國型男般幽默浪漫，實情男女朋友一齊睇就最啱。
大話男Vs黑面神 火星撞地球
雖然係年頭，但大片DVD唔多，這類小品溫情片反有機會跑出！頭先講完咁多Warm爆劇情，大家鍾唔鍾意就不得而知，但可以肯定，故事中兩位主角的性格簡直一天一地，拍拖前更每次火星撞地球，笑料百出！好似艾朗艾克講大話𠱁鍾絲食嘢一幕就好經典，連自己阿嫲都擺上枱；鍾絲嘅性格剛好相反，工作過份認真、固執兼臭脾氣，但靚女冇計，依然咁多人愛。
溫馨情節無處不在
法式晚餐
買晒餸去鍾絲屋企嘆一頓法式晚飯，然後玩遊戲！
煎靚班戟
到第二朝起身，「父女檔」炮製一頓班戟早餐給鍾絲品嚐。
同事齊心
戲裏面同事間經常研究新菜式，互相勉勵！
鄰里互助
失婚漢見到鍾絲遇上麻煩，即主動相助，好唔話得。
寬容原諒
小姪女冇精神返學，但校長依然擺出寬容態度。
幕後廚神花絮收錄
該批DVD版並不附送任何BonusDisc，但如果想睇幕後製作花絮，主目錄上依然搵得到。提到《美味不設防》謎團之一，就要講吓點解班演員嘅廚藝會突飛猛進！原來，真正廚神係一位貌似谷德昭嘅法籍男子以及另一名華籍女子，劇情中所有菜譜及菜式，全由佢哋精心炮製；更重要係，佢仲教識兩位主角做好多廚師必備小動作，令模仿時更入型入格，例如拋鑊、掟毛巾……至於「例牌菜」如人物專訪、直擊拍攝現場等通通有齊，都算豐富，收貨喇！
《美味不設防》
類型：DVD
片種：愛情+溫情
導演：史葛克斯
主演：嘉芙蓮薛達鍾絲、艾朗艾克、艾碧高布絲蓮
發行：華納
級別：I
售價：$98
查詢：DVDPro（23326326）