旺角Peter睇好煤股，「𠵱家啲電廠話冇煤可燒，搞到要停產，啲煤股一定得，噚日市況唔好，但係三隻煤炭股照升，學四叔話齋：『點得着嘅實得！』」三隻煤股中，Peter揀中煤能源（1898），該股噚日收報26.15蚊，升1%。
法興證券衍生工具部亞洲區董事李錦話：「近排都有好多有識之士問關於能源股嘅窩輪，問得，唔多唔少都有啲指標，中煤能源係一個唔錯嘅選擇。」孫柏文擔心如果電廠罷買煤，最終有可能損害煤價，Peter就話：「大陸成日有煤礦爆炸，由於安全問題，中央將細嘅煤廠關閉，等大嘅煤廠兼併，大廠就成為政策傾斜嘅受惠者。大家都係炒政策傾斜，你都係咁先推介隻江銅！」
法興證券衍生工具部策略師朱紅就建議，Peter可以考慮價內嘅中煤能源窩輪：「行使價大約23、24蚊，8至9月到期嘅call輪。」
點解冇電力股put輪
講開窩輪，Peter即刻追問點解冇電力股put輪，「其實全部電力股都應該出put輪啦，但係我睇過，所有電力股都冇put輪喎！」
李錦解釋，輪商發輪除咗留意市場需求，亦會考慮風險。Peter回應：「家陣電力股個勢咁差，加電價已經唔使諗，煤電聯動最快都要下半年先有聲氣，你哋出電力股put輪，一定賣個滿堂紅。」
中國銀行（3988）
高位回落夠穩陣
呢幾日霧鎖香江，大埔關公語帶雙關話：「一於博大霧，買中行（3988）。近排大市咁波動，叫人入市即係推人入火坑，不過中行由5蚊高位回落至𠵱家3.5蚊左右，都算穩陣，可以入貨過吓手癮。」關公建議現價買入，目標價4蚊，睇升11%。中行噚日收報3.59蚊，跌2.2%。
中銀香港更值博
孫柏文問：「你個價set得好緊喎！」關公回應：「咁先跌唔死。」李錦認為中銀香港（2388）更吸引，「除咗炒大陸內需概念，香港內需股都唔錯，今年大家估香港經濟有5、6%增長，通脹高，好似中銀香港、港鐵（066）都會比中行更值博。」
朱紅就話：「中行喺中資銀行股入面比較落後，唔係博反彈嘅吸引選擇，係都揀建行（939）值博啲！」
《關公建議建議》
買入價：$3.59 目標價：$4
止蝕價：$3.45 時間：長期
滙豐銀行（005）
資產往績好過建行
銅鑼灣Frederick推介滙豐（005），話現價買少少，令自己對股價有啲感覺，一路跌一路再吸納，止蝕價100蚊，長揸兩年。滙豐噚日收123.6蚊，跌2.1%。
李錦話：「我自己有買滙豐，一年收4次息，年息5厘，其實防守性好強，適合一啲穩陣、保守嘅投資者，如果唔想將啲錢放喺銀行，買滙豐係一個好好嘅選擇。」
次按撥備成隱憂
Frederick話滙豐市值1.5萬億，絕對係大股，「除非再發生好似911嘅突發事件，滙豐先有可能落番100蚊，論歷史同資產值，都好過市值差唔多嘅建行（939）好多。」
孫柏文擔心滙豐嘅次按問題未完全反映喺股價上面，朱紅同意話：「滙豐由舊年開始跌到𠵱家120蚊左右，但都未完全反映對次按壞賬嘅撥備，如果仲有壞消息出嚟，相信會再有沽壓。」
《Frederick建議》
建議買入價：$123.6 目標價：－
止蝕價：$100 時間：2年
江西銅業（358）
商品勢佳唔怕追
西貢Michael推介江西銅業（358），喺19.6蚊入咗貨，佢話上次聽完孫柏文介紹，覺得江銅唔錯，加上商品形勢大好，於是入貨。江銅噚日收20.4蚊，跌3.5%。
李錦話：「以資源股嚟講，江銅股價上落波幅好犀利，以窩輪嚟講更屬半冷門股，成交時大時細，股價兩三日變動可以超過10至15%，所以無論玩正股定窩輪，最緊要『見好即收』，如果江銅升10至15%唔止賺，隨時坐艇。」孫柏文提醒：「銅價喺200天線有明顯阻力，噚日都喺200天線前落番嚟，如果屢攻不破，銅價可以跌得好急，所以短期要小心。」
《Michael個案》
買入價：$19.6 目標價：$25
止蝕價：$16 時間：3個月
廣船國際（317）
盈利吸引博反彈
九龍灣梁太推介廣船國際（317），睇好係因為廣船舊年首三季盈利大升2.5倍，加上股價由舊年10月60蚊樓上，跌到𠵱家唔夠40蚊，累積跌幅達四成三，係時候吸納博反彈。廣船噚日收報39.1蚊，升3.4%。
梁太話：「呢隻股喺過去一年由十幾蚊升上六十幾蚊，升勢唔錯，可惜舊年10月開始回落。𠵱家股價跌咁多，又有盈利配合，想喺現價買入，目標價睇43蚊。」
朱紅提醒：「你要留意廣船舊年業績包括非核心盈利貢獻，嚟自買賣業務嘅收益係一次性，投資者應該將注意力放喺持續嘅收入上面。」
《梁太建議》
建議買入價：$39.1 目標價：$43
止蝕價：$37 時間：1個月
下周一嘉賓：東方匯理衍生產品董事李靄欣
每日收市後4:30pm
歡迎Phonein28698262
http://appleactionews.com/features/finance/
想搵名家教路，請登入
http://appledaily.atnext.com/jp/finance登記
成功參與節目者，有機會獲贈禮品，
登記成為「Webcam之友」，更有機會獲得（aastocks）即時報價賬戶
*下午3時半開始，優先接受登記
