馬會同政府為咗邊個出錢興建港鐵南港島線跑馬地站反晒面咁款，噚日跑馬，馬會主席陳祖澤喺馬場俾記者追問事件。佢笑笑口反駁官員，指跑馬地站興建喺馬場旁邊，政府要馬會孭晒工程費，咁海洋公園站喺正公園大門口，係咪應該由海洋公園找數呢？
陳祖澤做官時出名多橋，𠵱家啲局長、常秘入行時，隨時未夠資格幫佢寫會議紀錄。佢寸完官員，再氣定神閒解釋，馬會係非牟利機構，馬迷投注可以用嚟鋪草皮，倒貼畀上市嘅港鐵起車站點講都唔通，所以由馬會畀晒錢一定noway。
左右開弓後，陳祖澤終於講到戲肉，佢話如果港鐵同政府讓步，同意分擔開支，唔係完全冇得傾，傾唔傾得掂就要睇條件，有咩條件呢？就係如果馬會出錢起跑馬地站，日後若然有上蓋物業發展，馬會可唔可以分番份呢？薑係老嘅辣，陳祖澤開出條件仲辣，八方相信官員實啃唔落。