聖誕電影當中，《投名狀》為華語電影（港產電影？）爭回一口氣，叫好叫座，大陸票房尤其凌厲，令陳可辛榮登億萬大導行列，當得上億萬大導，即是得到國家認可，可喜可賀。
《投名狀》拍得真的好，也就正正是因為拍得好，所以看得非常沉鬱，散場時觀眾不言不語，與節日氣氛格格不入。
兩齣動畫片均不收旺場，《蜜蜂電影》與《花鼠明星俱樂部》的定位有點奇怪，細路又唔係睇得太明，大人又唔太投入，所以反應普普通通。《魔幻羅盤》則啱晒一家大細睇，小朋友尤其睇得眉飛色舞，個人喜歡《魔幻羅盤》更勝《哈利波特》，因為齣戲夠短，毋須躭在戲院內兩個幾三個鐘頭，而且唔睇唔知，原來《哈利波特》的人物、文化、情節跟《魔幻羅盤》非常近似，天下故事一大抄，承先啓後，達者為先。
有人話《魔間傳奇》唔好睇，我卻覺得幾緊張刺激，起碼拍出喪屍電影的一點新意，WillSmith做戲又幾多表情，算得上娛樂佳片。好多人話《驚天奪寶：世紀秘冊》好好睇，我反而覺得普普通通，因為曾經睇過《奪寶奇兵》系列，印第安納鍾斯博士帶着觀眾一起去搵約櫃、搵聖杯，故事更引入入勝，史匹堡的導演手法也更扣人心弦，《異獸戰2》中兩大經典電影太空怪物再決一死戰，可惜迷幻BobMarley式的鐵血戰士成日行嚟行去變成冇晒神秘感，本來陰森奸險恐怖殘忍的異形卻被描寫成一條光頭笨實惡狗，冇厘醒目，對打時畫面又黑又碎，分唔清邊個打邊個。
聖誕多戲睇，但冇齣係聖誕戲，懷念以往聖誕時睇《聖誕奇遇結良緣》或《LoveActually》，勝在應節。