美國方言協會選出去年的風雲字眼，次按subprime列為榜首。另外又選最有用的環保代名詞green（不是指美鈔）。最創意和最無禮都有揀，香港也來選的話，07風雲字眼，必然是「忽然××」了。橫跨07/08的，大概也有下列幾個：
最無奈：2012雙普選。等於祝人長命百歲，壽比南山，明知是純齋talk，得個講字，阿爺和老天爺都唔會如你所願。
最多餘：民調指七成市民接納2017普選特首。無理由會唔接納，等於曾特首明天宣佈全港市民人人可以拿身份證去庫房取二千元過新年，不過不是今年取，而是2017，你會反對麼？
最吊癮：2020立法會直選。還有冇功能組別阻住地球轉呢？冇人（大代表）能夠話你知。
最吃香：四叔。一言九鼎，四叔預測股市比特首講普選路線圖要爽快大方，信得過。
最滯：北京奧運。由劉德華到張學友都講，會休息一年睇奧運。從一月到八月經過大半年日日炒作，想唔悶都難。
最得啖笑：奧運金牌。跟小市民有乜關係？麵包又唔會減價買一送一。