PhilippeStarck　人頭凳

法國著名設計師PhilippeStarck最近殺入香港，你喺半島酒店Felix餐廳見慣見熟嗰張凳，分分鐘可以搬返屋企喇。PhilippeStarck旗下品牌xODesign系列，新開showroom喺金鐘插旗，盡騷經典作品。只要親身見過大師嘅設計，以第一身體驗佢幽默、簡約嘅風格，都會深深愛上其作品。

記者︰劉昱蘭　
攝影︰伍慶泉　
Model︰Ice（PureModels）

愛唐樓夠中式

要人人都識，點可以唔入大中華呢個龐大市場。法國名設計師PhilppeStarck，份人好flexible，唔介意為客人tailor-made，好似上海Volar、Lan等夜店，都有要求Starck設計家品。最近大師嚟香港金鐘開店，居然唔開地舖要上樓，因為愛唐樓夠Chinese，有中西合璧的意思，而整間店都無分zone搞裝修，就好似一個openarea咁。現時，大師共有38件作品，香港嘅700呎showroom暫時擺咗約28件，但遲些會陸續返貨。

要全世界人識自己

Starck嘅雄心壯志，係每家每戶都有自己嘅產品，除枱凳外，牙刷、榨汁機、眼鏡都有設計，平至一、兩千，貴至十幾萬都有，銳意在最短時間內俾多啲人認識自己，實行以平價攻入平民屋。另外，佢亦target酒店客，人流多自然紅得快啦。

設計總統套房響朵

PhilippeStarck出生於設計家族，爸爸係設計師，細細個就鋸嘢剪嘢，拼拼合合當玩具玩到大，長大後順理成章做設計師和建築師。響朵之作係在1976年，當佢為巴黎夜店搞設計時，竟然被法國總統叫咗去佈置套房，咁你話有乜理由唔一炮而紅？

高檔產品入酒店

Showroom內28件作品分高檔和簡約兩個系列，高檔貨中，04年出產嘅Bonze都算係最grand。人頭像的陶瓷凳，印上眼、眉、口、鼻，可當擺設、凳或小茶几用都得，以紀念15、16世紀嘅一個統治者Lorenzode'Mebici。另一作品Royalton，設計成水母形狀的吧凳，名字本是紐約一間酒店名，本身係為此酒店而設計，作品重點係凳腳嘅4個倒鈎和上粗下窄的凳腳。